Ուկրաինան պատրաստ է հանդիպել. Զելենսկին՝ Ստամբուլում բանակցելու վերաբերյալ Պուտինի առաջակին

Ուկրաինան պատրաստ է հանդիպել.  այս մասին թելեգրամյան ալիքում գրել է Ուկրաինայի նախագահ Վլադիմիր Զելենսկին՝ արձագանքելով Ստամբուլում առանց նախապայմանների ուղիղ բանակացություններ սկսելու մասին ՌԴ նախագահ Վլադիմիր Պուտինի առաջարկին:

«Լավ նշան է, որ ռուսները վերջապես մտածում են պատերազմն ավարտելու մասին։ Աշխարհում բոլորը շատ երկար են սպասել դրան։ Եվ ցանկացած պատերազմի իրական ավարտի առաջին քայլը հրադադարն է: Անիմաստ է սպանությունները նույնիսկ մեկ օր շարունակել։ Մենք ակնկալում ենք, որ Ռուսաստանը կհաստատի հրադադարը՝ ամբողջական, տևական և վստահելի, սկսած վաղվանից՝ մայիսի 12-ից: Ուկրաինան պատրաստ է հանդիպել»,- գրել է նա։

Ավելի վաղ Պուտինն ասել էր, որ Ռուսաստանն Ուկրաինային առաջարկում է մայիսի 15-ին, Ստամբուլում առանց նախապայմանների վերսկսել ուղիղ բանակցությունները, որոնք ընդհատվել էին 2022 թվականին:

«Մենք առաջարկում ենք առանց հետաձգման սկսել հաջորդ հինգշաբթի՝ մայիսի 15-ին, Ստամբուլից, որտեղ դրանք (բանակցությունները) անցկացվել են ավելի վաղ և որտեղ ընդհատվել են», - ասել է Պուտինը։

Նրա խոսքով, վաղը ծրագրված է զրույց  իր թուրք գործընկեր Ռեջեփ Թայիփ Էրդողանի հետ, որի ընթացքում նա կհարցնի բանակցություններ վարելու հնարավորության մասին։ Պուտինը չի բացառել նոր, «իրական զինադադարի» շուրջ համաձայնության հասնելու հնարավորությունը։

ՌԴ նախագահն ընդգծել է, որ Մոսկվան պատրաստ է առանց նախապայմանների բանակցությունների։ «Մենք պատրաստ ենք Ուկրաինայի հետ լուրջ բանակցությունների», - վստահեցրել է Պուտինը։ Երկրի ղեկավարը դրանց իմաստը որակել է որպես «հակամարտության արմատական ​​պատճառների վերացում» և «պատմական հեռանկարում երկարաժամկետ, տևական խաղաղության հաստատմանն ուղղված քայլեր»։

«Մենք չենք բացառում, որ այս բանակցությունների ընթացքում հնարավոր կլինի պայմանավորվել ինչ-որ նոր  և իրական զինադադարի շուրջ»,- ասել է Պուտինը։