Ի՞նչ են որոշելու Արցախի խորհրդարանականները

Մայիսի 21-ին լրացավ Արցախի նախագահի պաշտոնավարման ժամկետը։ Թափուր պաշտոնի համար դեռևս առաջադրումներ չկան, ընդամենն Արցախի խորհրդարանին հաջողվել է արտահերթ նիստ գումարել և խորհրդարանի նախագահ ընտրել «Ազատ հայրենիք-ՔՄԴ» խմբակցությունից Աշոտ Դանիելյանին։ Բանն այն է, որ Արցախի խորհրդարանի գործող նախագահ Դավիթ Իշխանյանը 2023 թ․-ից բռնի պահվում է ադրբեջանական բանտում, ինչը որոշակիորեն ազդել էր Արցախի խորհրդարանի աշխատանքի վրա, խորհրդարանի նախագահի պարտականությունները կատարում էր նրա տեղակալը, որը Սամվել Բաբայանի կուսակցությունից էր։

Այժմ ամենամեծ խմբակցությունից Ազգային ժողովի նախագահ ընտրելով, արցախցիները, փաստորեն արձանագրում են, որ շարունակելու են պահպանել Արցախի Ազգային ժողովը, բայց ԱԺ-ից բացի, կարևոր է նաև նախագահի ինստիտուտի պահպանումը։ Սամվել Շահրամանյանը դեռևս չի հայտարարել՝ արդյոք առաջադրելո՞ւ է իր թեկնածությունը, թե՞ ոչ։ Խորհրդարանի 5 խմբակցություններն էլ հակված են «ֆորս-մաժորային քայլերի չգնալ, կտրուկ և ցավոտ պրոցեսներ չսկսել, փոխարենը հանդարտ շարունակել ընթացքը, ուստի և մեծ հավանականությամբ, հենց Շահրամանյանի թեկնածությունը կառաջադրեն առաջիկա օրերին։

Թեպետ Հայաստանի գործող իշխանություններն ամեն կերպ ընդդիմանում են Արցախի խորհրդարանի այս ցանկությանը, բայց նույնիսկ ամենամեծ ընդդիմադիր խմբակցությունը, որն առանձնապես հակված չէ գործակցել Արցախի ԱԺ մյուս ուժերի հետ, 2023 թ․-ին էլ դեմ են քվեարկել Սամվել Շահրամանյանի թեկնածությանը, այս անգամ կարծես հակված են հենց գնալ այդ ճանապարհով և առաջադրել Շահրամանյանին։

Ագնեսա Աբգարյան