ՆԳՆ-ում մեկնարկել է ապագա պարեկային ծառայողների ամփոփիչ պետական ատեստավորումը

Պարեկային ծառայողների մասնագիտական պատրաստվածությունն ու կարողությունների զագացումը մշտապես ՆԳ նախարարության ուշադրության կենտրոնում է։

Դեկտեմբերի 4-ին ՆԳՆ կրթահամալիրում մեկնարկել է ապագա պարեկային ծառայողների ամփոփիչ պետական ատեստավորումը: Ատեստավորման գործընթացին հետևել է Պարեկային ծառայության պետ, ոստիկանության պետի տեղակալ Արթուր Խուդինյանը՝ տեղում ծանոթանալով ապագա պարեկների պատրաստվածությանն ու մասնագիտական հմտություններին։

ՆԳՆ կրթահամալիրի ռեկտոր Մանուկ Մուրադյանի խոսքով՝ կրթահամալիրը համակարգը պրոֆեսիոնալ կադրերով համալրելու ուղղությամբ շարունակական աշխատանք է իրականացնում. «Պարեկ որակավորմամբ կրթական ծրագրի տևողությունը 6 ամիս է. այն ներառում է հիմնական պրակտիկ և տեսական ուսուցում և տեղերում պրակտիկայի կազմակերպում: Ընդհանուր առմամբ՝ կրթահամալիրում ուսման տևողությունը 5 ամիս է, իսկ մեկ ամսվա ընթացքում սովորողները Պարեկային ծառայության համապատասխան ստորաբաժանումներում անցնում են պրակտիկա»,- նշել է կրթահամալիրի ռեկտոր Մանուկ Մուրադյանը:

Հիշեցնենք նաև՝ Պարեկային ծառայության համալրման նպատակով ՆԳՆ կրթահամալիրում իրականացվում է ընդունելություն։ Սահմանվել է 250 տեղ` Պարեկային ծառայության Երևանի և մարզերի ստորաբաժանումների համար: Դիմորդների փաստաթղթերն ընդունվում են ՆԳՆ կրթահամալիրում մինչև դեկտեմբերի 13-ը։