«Գործող վարչախումբը ներգրավված է դեղերի բիզնեսի մեջ». Հրանտ Բագրատյանը կասկածներ ունի

Հայաստանի վիճակագրական կոմիտեն գործազրկությունը շատ քիչ է ցույց տալիս, որովհետև հաշվի է առնում նման մի բան՝ գործազուրկ է Հայաստանում այն մարդը, ով ակտիվ փնտրում է աշխատանք, այս մասին Սամվել Կարապետյանի տնտեսական ծրագրի շնորհանդեսին հայտարարեց «Մեր ձևով» շարժման համակարգող Նարեկ Կարապետյանը։

Նրա խոսքով՝ Հայաստանում կա 800 հազար գրանցված աշխատող, 3 միլիոն բնակչության մեջ 800 հազարն է գրանցված։

«3 միլիոն բնակչության մեջ ունենք 500 հազար թոշակառու, մոտ 700 հազար ուսանողական կամ դպրոցական տարիքի երիտասարդ, իսկ մնացածը... այսինքն՝ ունենք 1.8 միլիոն մարդ ու աշխատում է 800 հազար մարդ»,- նշեց Կարապետյանը։

Նա ասաց, թե Վիճակագրական կոմիտեի տվյալները ցույց էին տվել, որ Գեղարքունիքի մարզում գործազրկության մակարդակը 4 տոկոս է։

Շնորհանդեսին ներկա է նաև ՀՀ նախկին վարչապետ Հրանտ Բագրատյանը, ով ներկայացրեց իր դիտարկումները։

Բագրատյանը «0 տոկոս հարկ բիզնեսի համար» կետի հետ համաձայն չէ, ասաց, թե զգուշավոր է վերաբերվում նման հարկային արտոնություններին։

«Անկեղծ ասած՝ համաձայն չեմ, ավելին՝ կարծում եմ, որ շրջանառության հարկը պետք է ընդլայնել»,- նշեց նա։

ՀՀ նախկին վարչապետը կասկածում է, որ գործող վարչախումբը ներգրավված է դեղերի բիզնեսի մեջ։