«Տիրադավ եպիսկոպոսներ, ծնկաչոք ապաշխարե՛ք Աստծո առաջ». Հարություն Աղա-Սարգսյան

Հայոց եկեղեցու պահպանության համահայկական խորհրդի նախագահ Հարություն Աղա-Սարգսյանը հանդես է եկել հայտարարությամբ․

«Հայ Առաքելական Եկեղեցին հարկադրված է եպիսկոպոսաց ժողովը կազմակերպել արտերկրում, որովհետև Հայաստանում ստեղծվել է մթնոլորտ, որտեղ սրբազանների վրա կարող են գործադրել ուղղակի ու անթաքույց ճնշում՝ սպառնալիքով, վարչական լծակներով և քարոզչական հարձակումներով։ Սա հանցավոր փորձ է՝ Եկեղեցին կոտրելու և ծնկի բերելու, նրան լռեցնելու և դարձնելու հնազանդ գործիք՝ հոգին խլած, արժանապատվությունը պոկած, ներսից քայքայված։

«Բարեկարգում» ասելով՝ ՀՀ իշխանությունները փորձում են անցկացնել ամենավատը՝ Եկեղեցու հեղինակության նվաստացում, պառակտում, հոգևոր կարգի խախտում, սրբությունների նկատմամբ անարգանք։ Եկեղեցին նախարարության բաժին չէ, որ վերևից հրահանգով «բարեկարգվի»։ Ոչ մի պաշտոնյա իրավունք չունի ձեռք տալու Եկեղեցու կարգին. դա մեղք է, լկտիություն և հատկապես սրբապղծություն՝ և՛ Աստծո, և՛ ժողովրդի դեմ։

Դիմում եմ երեսպաշտ դավաճան եպիսկոպոսներին.

Ձեր այս պահվածքով դուք կորցրել եք հայ հոգևորականի բարձր կոչման բարոյական իրավունքը և այլևս արժանի չեք կանգնելու Սուրբ Սեղանի առաջ, որովհետև վախից դարձել եք Եկեղեցու դեմ ուղղված արշավի մանր սպասարկող։

Երբ սրբազանը կանգնում է իշխանական ճնշման կողքին և ելնում է ընդդեմ իր Եկեղեցու՝ «բարեկարգման» շղարշով, դա արդեն ոչ թե «այլ կարծիք» է, այլ՝ սրբազանի կոչման ոտնահարում, ազգային խղճի դավաճանում և աներես ստորացում:

Անմիջապես դադարեցրե՛ք Եկեղեցու դեմ արշավին ձեր անունով «օրհնություն» տալը և այդ պիղծ գործին մասնակցելը։

Հրաժարվե՛ք ձեր այս ամոթալի դիրքից, հրապարակայնորեն հետ վերցրե՛ք ձեր հայտարարություններն ու քայլերը, և նույպես հրապարակայնորեն ներողություն խնդրե՛ք՝ Սուրբ Եկեղեցուց, հոգևոր դասից ու հավատավոր ժողովրդից։

Ծնկաչոք ապաշխարե՛ք Աստծո առաջ՝ քանի դեռ ձեր մեղքը անուղղելի դատավճիռ չի դարձել ձեր մարդկային և հոգևոր կոչման վրա։

Պատմությունը անողոք է եղել նրանց հանդեպ, ովքեր դավաճանական շահի համար կոտրել են հայ ժողովրդի հոգևոր ողնաշարը։

Մեր հիշողության մեջ դավաճանության օրինակներ են հիշատակվում Վասակ Սյունին, Մեհրուժան Արծրունին, Վեստ Սարգիսը, մելիք Ֆրանգյուլը, Վարանդայի մելիք Շահնազարը։ Մի՛ փորձեք ձեզ համար տեղ պատրաստել այս ամոթալի շարքում։ Այդ ճանապարհը վերջ չունի՝ բացի անեծքից։ «Խելքի՛ աշեցեք» (Ջիվանի)»։