Դատարանների աշխատակիցներին նորի՞ց խաբեցին․ աշխատավարձի խոստացված բարձրացումը «տեղ չի հասնում»

Առաջին ատյանի դատարանների աշխատակիցները կրկին խաբված են իրենց զգում, քանի որ խոստացվել էր հունվարի 1-ից բարձրացնել աշխատավարձերը։
24News-ի հետ զրույցում դատարանի աշխատակիցներից մեկն ասաց, որ հունվար ամսվա համար նախատեսված աշխատավարձն արդեն ստացել են, բայց խոստացված բարձրացումը չի եղել։

Մեր զրուցակիցն ասում է, որ վերջին անգամ 2022 թվականին է բարձրացում եղել 20 հազար դրամով, արդեն երեք տարի է՝ խոստանում են, որ իրենց աշխատավարձը կբարձրանա, բայց ապարդյուն։ Նշենք, որ գործավարն ու նիստերի քարտուղարները ստանում են 120 հազար դրամ աշխատավարձ, իսկ դատավորների օգնականները՝ 260 հազար դրամ։

Մեր տեղեկություններով, կան դատավորներ, ովքեր դրսևորում են «բարի կամք» և իրենց հաշվին, ավել գումար են վճարում իրենց կազմերի աշխատակիցներին՝ հաշվի առնելով ծանրաբեռնվածությունն ու այն դժվար աշխատանքը, որը կատարում են դատավորների աշխատակազմերի աշխատակիցները, սկայն դա, ըստ էության, չի լուծում խնդիրը։
Չնայած, որ դատարանների վրայից հանվել են արբիտրաժներն ու պարզեցված վարույթները, միևնույն է՝ դատարաններն աշխատում են ծանրաբեռնված։

Մեր զրուցակիցը նշում է նաև, որ հայցերը շատացել են և՛ թղթային, և՛ էլեկտրոնային։ Լիազորությունները կասեցված դատավորների վարույթներում գտնվող գործը բաշխվում են այլ դատավորների վրա, այդ պարագայում իրենք ստիպված են լինում սկզբից քննել գործը, ինչը հավելյալ ծանրաբեռնվածություն է առաջացնում։

Բացի դա, գործերը հասցնելու համար նրանք ստիպված են լինում աշխատել արտաժամյա, երբեմն էլ հանգստյան օրերին, ինչի համար, բնականաբար, հավելյալ չեն վարձատրվում։
Նշենք, որ այս հարցով դիմեցինք նաև Բարձրագույն դատական խորհրդին, մեզ պատասխանեցին, որ հռնց հիմա կառավարությունում դա նախագծի տեսքով քննարկվում է: Նաև հավելեցին, որ դրա հասցեատերը իրենք չեն, այլ Կառավարությունն ու արդարադատության նախարարությունը։

Հիշեցնենք, որ մամուլում տեղեկություն էր տարածվել, որ նախարարները ամանորին մինչև 7 մլն դրամ պարգևավճար են ստացել։ Օրինակ, Արդարադատության նախարար Սրբուհի Գալյանը լրագրողների հետ զրույցում հայտնել էր․ «Մոտ 6-7 միլիոնի կարգի՝ հարկերը հանած, հավելավճար եմ ստացել»։ Պարգևատրվել էին նաև պետական համակարգի բազմաթիվ աշխատակիցներ։