Ե՞րբ է սկսվելու Գյումրու «չոր նավահանգստի» շինարարությունը. նախարարության պատասխանը
Հայաստանում պատկան մարմիներից որևէ մեկը չգիտի, թե երբ է սկսվելու Գյումրիում «չոր նավահանգստի» և արդյունաբերական հանգույցի շինարարությունը։ Նման եզրակացության կարելի է հանգել Sputnik Արմենիայի գրավոր հարցմանը ՀՀ էկոնոմիկայի նախարարությունից ստացված պատասխանից։
Ավելի վաղ հայկական կողմը հայտարարել էր, որ շինարարական աշխատանքները պետք է սկսվեն 2024 թվականի երկրորդ կեսին։ Արդեն 2025 թվականի դեկտեմբերին ՀՀ վարչապետ Նիկոլ Փաշինյանը Համբուրգում լրագրողների հետ զրույցի ժամանակ հայտարարեց, որ տեղի նավահանգստի ղեկավարությունը հետաքրքրված է Գյումրիում «չոր նավահանգիստ» ստեղծելու նախագծով։
Նախարարությունից մեր հարցերին ի պատասխան հայտնեցին, որ նախագիծը դեռ արդիական է։ Մասնավորապես, Շիրակի մարզում նախատեսվում է իրականացնել «չոր նավահանգիստ» ներդրումային ծրագիրը, որը կտեղակայվի օդանավակայանի, երկաթուղու, Թուրքիայի հետ սահմանի հարևանությամբ: Ծրագրի նպատակն է զարգացնել լոգիստիկ և արդյունաբերական ենթակառուցվածքները:
«ՀՀ էկոնոմիկայի նախարարության պատվերով միջազգային փորձագետների կողմից իրականացվում է ծրագրի իրագործելիության ուսումնասիրություն՝ Հայաստան–Թուրքիա, Հայաստան–Ադրբեջան սահմանների բացման սցենարի համատեքստում»,– պատասխանել են նախարարությունից:
Գերատեսչությունից հավաստիացրել են, որ զուգահեռաբար նախագիծը քննարկվում է տեղական և միջազգային ներդրողների և օպերատորների հետ։
Միևնույն ժամանակ, ծրագրի ամբողջական պատկերը հնարավոր կլինի ստանալ միայն իրագործելիության ուսումնասիրության ավարտից հետո: Նախարարությունից խոստացել են անհրաժեշտության դեպքում հրապարակել այն։
Հիշեցնենք, որ Գյումրիում «չոր նավահանգիստ» նախագծի մասին հայտարարվել է դեռ 2021 թվականին։ Դրա հեղինակը գործարար և ՀՀ էկոնոմիկայի նախարարի նախկին խորհրդական Շառլ Մալասն է։ 2023 թվականի դեկտեմբերին MTBS նիդեռլանդական ընկերությունը պատրաստել էր «չոր նավահանգստի» տեխնիկա-տնտեսական հիմնավորումը։ 2024 թվականի հունվարին վարչապետ Նիկոլ Փաշինյանի գլխավորությամբ Ներդրումային կոմիտեն անցկացրեց նիստ, որի ընթացքում քննարկեց և հավանություն տվեց Շիրակի մարզի համար նախատեսված նախագիծը: Ավելին, այն ցանկանում էին ներառել «Խաղաղության խաչմերուկ» նախաձեռնության մեջ, իսկ շինարարությունը նախատեսվում էր սկսել արդեն 2024 թվականի երկրորդ կեսին։
«Հայկական ավիաուղիները» Երևան է տեղափոխել իր առաջին Boeing 737-800 տիպի ինքնաթիռը. «Հետք»
ՌԴ ԱԳՆ-ն «The Insider»-ի «ռուս գործակալների Երևանում գտնվելու» մասին լուրն անվանել է կեղծ
ՔՊ-ականներն ահաբեկում են անգամ անչափահասներին. «Հրապարակ»
ՔՊ՝ 28,8 %, «Ուժեղ Հայաստան»՝ 14,9%, «Հայաստան»՝ 12,1%, ԲՀԿ՝ 8,7 %, «Միասնության թևեր»` 5,8 %․ սոցհա...
«Նախընտրական Հայաստանը թուրք-ադրբեջանական ծրագրերում» թեմայով փորձագիտական քննարկում տեղի կունենա
«Հրապարակ». Հավաքին մասնակցելու համար ազատել են պաշտոնից
Միջնորդություն է ներկայացվել ԿԸՀ՝ Թևանյանի նկատմամբ հետապնդում հարուցելու համաձայնություն ստանալու
Մյասնիկյան պողոտայում բախվել են 2 «BMW» և «Hyundai Elantra»-ն. վերջինն էլ բախվել է ծառին. կա վիրավոր
Դիմակավորված անձինք ներխուժել են ԱԺ պատգամավոր Մարտուն Գրիգորյանի տուն
Ողբերգական ավտովթար՝ Սյունիքի մարզում. բախվել են 2 «Mercedes Sprinter»-ը. վարորդներից մեկը մահացել է