Ակնկալիք չունեմ՝ հաշվի առնելով զարգացումները և ՀԷՑ-ը խլելու փոքրիկ խմբակի ցանկությունը, բանակցությունների հիմք չեմ տեսնում. Դավիթ Ղազինյան

Առանձնապես ակնկալիք չունեմ՝ հաշվի առնելով զարգացումները և ՀԷՑ-ը խլելու փոքրիկ խմբակի ցանկությունը. «Տաշիր կապիտալի» հայցն ընդդեմ ՀԾԿՀ-ի, ՀԷՑ-ի լիցենզիան վերականգնելու վերաբերյալ դատական նիստից առաջ լրագրողների հետ զրույցում ասաց «Հայաստանի էլեկտրական ցանցեր» ՓԲԸ-ի տնօրենի նախկին ժամանակավոր պաշտոնակատար Դավիթ Ղազինյանը։

Նա հիշեցրեց, որ դատարանը մերժել էր կառավարչին և հանձնաժողովի նախագահին որպես վկա ներգրավելու միջնորդությունը․ «Ես պնդում եմ, որ նրանց ներկայությունն այստեղ անհրաժեշտ էր։ Մեկինը՝ իր պարտավորություններից և իրավունքներից դուրս հայտարարություններ կատարելու համար, երկրորդը՝ որպես կառավարիչ նշանակելու միանձնյա վարույթ հարուցող։ Այդ իսկ պատճառով առանձնապես ակնկալիք չունեմ»։

Ղազինյանը նշեց, որ գերակա շահ ճանաչելու հայտարարությունը ճանաչվել է անօրինական կառավարչի կողմից։

«Մինչև մայիսի 25-ը կլինի բանակցությունների փուլ, հետո նոր կգնա գերակա շահի»,- ասաց նա և նշեց, որ իրենք հակված չեն բանակցությունների՝ հաշվի առնելով արդեն կատարած առաջարկը։

«Այդտեղ բանակցությունների եզր ես չեմ տեսնում»,- ասաց նա։

Ինչ վերաբերում է արբիտրաժային դատարանին, նշեց, որ այստեղ գործը դեռևս քննության փուլում է գտնվում․

«Համոզված եմ՝ այնտեղ զանգովի արդարություն չի գործելու, և արդարությունը հաղթելու է»։