Փաշինյանը պատգամավորներին հանձնարարել է անցնել կոշտ հարձակման ընդդիմության դեմ

Որքան մոտենան խորհրդարանական ընտրությունները, այնքան գործող իշխանությունների հռետորաբանությունն ավելի ու ավելի է կոշտանալու՝ ընդհուպ անցնելով բարեկրթության բոլոր կանոնները։ Այսօր խորհրդարանում մեկնարկում է հերթական քառօրյան։ Մեր աղբյուրների փոխանցմամբ՝ կիրակի օրը Փաշինյանը, ով չափազանց զայրացած է եղել մետրոյում արցախցի կնոջ հետ իր իսկ սկանդալից, երեկոյան իր մոտ է հավաքել վարչության մի քանի անդամների, Ազգային ժողովի ղեկավարներին և պահանջել չափազանց կոշտ վերաբերմունք դրսևորել խորհրդարանական ընդդիմության նկատմամբ, ընդհուպ, եթե բանը հասնի նաև ձեռնամարտի, չզսպել քպականների կրքերը։

Տևական ժամանակ խորհրդարանում, իհարկե, բանը ձեռնամարտի չէր հասնում։ 2021-2022 թթ.-ին մի քանի դեպքերից հետո սովորաբար ամեն ինչ ավարտվում էր լեզվակռվով և բավականին սուր բանավեճով, բայց այժմ իշխանությունը նպատակ ունի հանրությանը ցույց տալու, թե ինքը տիրապետում է իրավիճակին բոլոր առումներով, այդ թվում նաև ընդդիմությանը՝ հարկ եղած դեպքում ծեծի ենթարկելով։ Արդեն իսկ, ըստ մեր աղբյուրի, ՔՊ-ում մի քանի պատգամավորների հանձնարարել են ուշադիր լինել և հարկ եղած դեպքում հարձակվել ընդդիմության՝ «Հայաստան դաշինքի» պատգամավորների վրա։

Իրավիճակը առավել սուր կարող է լինել արդեն չորեքշաբթի օրը՝ կառավարության հետ հարցուպատասխանի ժամանակ, եթե ընդդիմությունը մասնակցի այդ հարցուպատասխանին։ 

Նունե Եգանյան