Իշխանության միակ զենքը քվեների փոշիացումն է մնացել

Երեկ մեկնարկել է Ազգային ժողովի ընտրություններին մասնակցող քաղաքական ուժերի առաջադրումների փուլը։ Ընտրություններին մասնակցելու հայտ ներկայացրած կուսակցությունները կամ կուսակցությունների դաշինքները արդեն կարող են իրենց փաստաթղթերը ներկայացնել Կենտրոնական ընտրական հանձնաժողով։ Առաջադրումների համար քաղաքական ուժերն ունեն 9 աշխատանքային օր, վերջնաժամկետը՝ ապրիլի 23-ն է։ Մինչև այս պահը ԿԸՀ-ն որևէ փաստաթուղթ չի ստացել։ 2021 թ. արտահերթ խորհրդարանական ընտրություններին առաջադրվել էր 26 կուսակցություն և դաշինք, ընտրություններին մասնակցեց դրանցից 25-ը։

Արդյունքում ընտրություններին մասնակցած 1 մլն 281 հազար ընտրողներից 257 հազարի կամ 20 տոկոսից ավելի քվեները փոշիացվեցին, այդ ուժերը չհաղթահարեցին նվազագույն շեմը, իշխող «Քաղաքացիական պայմանագրին» հաջողվեց ստանալ սահմանադրական մեծամասնություն։ Նախնական գնահատականներով՝ 2026 թ. ընտրություններին կարող են մասնակցել նույն քանակի կամ ավելի շատ կուսակցություններ և դաշինքներ, իսկ հետևանքը լինելու է նույնը։ Փաստացի քվեների մի ահռելի զանգված կփոշիացվի՝ միտումնավոր առաջադրված իշխանական սատելիտների կամ սեփական ուժերը չգնահատած ընդդիմադիր միավորումների կողմից։

Սա հենց այն է, ինչին ձգտում է գործող իշխանությունը՝ հրաշալի հասկանալով, որ արդար պայքարում պարտվելու բոլոր հնարավորություններն ունի։ Իսկ մասնակից կուսակցությունների մեծ թիվը ապակողմնորոշելու է ընտրողների մի մասին։ Քանի դեռ ուշ չէ, ընդդիմությունը պետք է ուժ գտնի՝ մանր կուսակցություններին հորդորի լքել ընտրապայքարը՝ քվեները չփոշիացնելու համար։

Աննա Մարգարյան