Ուղղորդված մարդիկ զանգահարում ու օգնություն են խնդրում, որ մեկն ասի՝ կմտածեմ, գլխին սարքեն. Նարեկ Կարապետյան

Մենք ու հանրության նշանակալի մասը վստահ ենք, որ Սամվել Կարապետյանի ազատարձակման պարագայում, երբ հնարավորություն ստանա շփվել իր հայրենակիցների հետ, Հայաստանում ավելի կուժգնանա մեծ փոփոխությունների ալիքը, որի արդյունքում էլ մեր երկրիրը վերջապես կհասնի փոփոխության։ Այս մասին Հակակոռուպցիոն դատարանի բակում, լրագրողների հետ զրույցում ասել է «Ուժեղ Հայաստան» կուսակցության խորհրդի անդամ Նարեկ Կարապետյանը:

Խոսելով իր թիմակիցների մասնակցությամբ հրապարակվող ձայնագրությունների մասին՝ Կարապետյանն ասել է.

«Առաջինը կուզեի տիկին Ղումաշյանի դեպքին անդրադառնալ, որը շատ հատկանշական է նաև նրանով, որ այսօր և ամեն օր մեր շարժման անդամներին զանգահարում են տարբեր մարդիկ, օգնություն են խնդրում իրենց կողմից ուղղորդված ձևով, որպեսզի մեկն ասի՝ կմտածեմ, այդ մարդու գլխին ինչ-որ բան սարքեն»,-նշել է նա:

Նարեկ Կարապետյանը մասնրամասնել է, որ կուսակցության անդամ Գոհար Ղումաշյանը, իր մասնակցությամբ հայտնի ձայնագրությունում, խոսում է 104-ամյա վետերանի կնոջ հետ, որոնց օգնում է հնարավոր բոլոր հարցերով՝ արդեն 5 տարի:

«104-ամյա մարդը հաստատ որևէ կապ չունի ընտրության հետ, չգիտենք` քաղաքացիություն ունի, չունի: Դա տիկին Ղումաշյանի սրտի պոռթկումն է եղել, որի մասին բոլոր տվյալները իրավասու մարմինները ունեն, բայց հատուկ ձայնագրություններով են հանդես գալիս, որպեսզի անվանարկեն մարդկանց»,- ասել է «Ուժեղ Հայաստան» կուսակցության խորհրդի անդամ Նարեկ Կարապետյանը: