Խաչը «անհետացել» է բանակի խորհրդանիշից․ ՊՆ-ն լռում է, Պապիկյանը՝ թաքնվում. «Ժողովուրդ»

«Ժողովուրդ» օրաթերթը փորձել է Պաշտպանության նախարարությունից պարզել՝ երբ է փոխվել բանակի գերբը, ինչ իրավական կամ մասնագիտական հիմնավորմամբ է դա արվել, և հատկապես՝ ինչու է հանվել խաչը։ Սակայն Սուրեն Պապիկյանի ղեկավարած գերատեսչությունից որևէ հստակ պատասխան չեն տվել։ «Ժողովուրդին» փոխանցել են միայն, որ թեմային կանդրադառնան «մայիսի 28-ից հետո»։

Սակայն այստեղ առաջանում է հիմնարար հարց՝ ինչո՞ւ բանակի նման կարևոր խորհրդանիշի փոփոխությունը նախապես չի ներկայացվել հանրությանը։ Ինչո՞ւ հասարակությունը փաստի առաջ է կանգնում արդեն կատարված փոփոխությունից հետո։ Եթե խոսքը պետական խորհրդանիշի վերափոխման մասին է, ապա առնվազն ակնկալելի էր բաց և թափանցիկ գործընթաց՝ հանրային քննարկումներով, պատմաբանների, հերբագետների, եկեղեցու և զինվորական շրջանակների մասնակցությամբ։Փոխարենը՝ ստացվում է, որ իշխանությունը հերթական անգամ կարևոր որոշում է կայացրել ինքնագլուխ՝ հանրությունից թաքուն։

Առավել ուշագրավ է հենց խաչի անհետացման հանգամանքը, քանի որ հայկական բանակի խորհրդանիշներում քրիստոնեական և ազգային տարրերը միշտ ունեցել են ոչ միայն պատմական, այլև արժեքային նշանակություն։

«Ժողովուրդ»-ը նկատեց, որ Երևանի Հանրապետության հրապարակում արդեն կախված են «Հանրապետության օր» գրությամբ մեծ պաստառներ, որոնց վրա ՀՀ Զինված ուժերի զինանշանին նմանվող ենթադրյալ նոր խորհրդանիշն է պատկերված։ Այդ նոր տարբերակում, իհարկե, կա ՀՀ եռագույնը, դրա վրա՝ ՀՀ քարտեզը, որը ՔՊ-ականների նախընտրական կրծքերն է հիմա զարդարում, կա նաև արծիվ՝ մի ձեռքում սուր, մյուսում՝ խաչ։

Սակայն ՀՀ պաշտպանության նախարարության պաշտոնական կայքում այս պահին առկա զինանշանի տարբերակի վրա պատկերված է ՀՀ դրոշը՝ առանց քարտեզի, ինչպես նաև արծիվ, որը բազմած է խաչապատկեր վահանի վրա, իսկ սուրը՝ պատյանի մեջ է։

Հիմա Պապիկյանն իր ճաշակով փոխել է մեր ազգային բանակի զինանշանը ու հարկ չի համարում անգամ պարզաբանել՝ ինչու, ինչպես և երբ»։