«Խորհրդավոր ընթրիք». նոր նախագիծ՝ հայտնի դերասանների մասնակցությամբ

Հունիսի 15- ին՝  PanArmenian TV-ի յութուբյան ալիքով կկայանա «Խորհրդավոր  ընթրիք» նախագծի պրեմիերան: Այս մասին Tert.am Life-ի հետ զրույցում ասաց սցենարի հեղինակ Անահիտ Մխիթարյանն ու պատմեց առաջին մանրամասները.

«Խորհրդավոր ընթրիք» անվանումը միաժամանակ հղում է և՛ պատմությանը, և՛ մարդու ներաշխարհին։ Աստվածաշնչում վերջին ընթրիքը դարձավ մի պահ, որտեղ նույն սեղանի շուրջ նստած էին հավատարմությունը, սերը, կասկածը և դավաճանությունը։ Այդ պահին ոչ բոլորը գիտեին, թե ինչ է թաքնված մյուսի սրտում, և հենց այդ անտեսանելի ճշմարտություններն էին ընթրիքը դարձնում խորհրդավոր»,- մեզ հետ զրույցում նշեց Անահիտ Մխիթարյանն ու հավելեց, որ այս անվանումը հիշեցնում է, որ յուրաքանչյուր հանդիպման մեջ կա բացահայտելու բան, և երբեմն ամենամեծ խորհուրդը ոչ թե ասված խոսքերն են, այլ այն, ինչ մարդը դեռ չի ասել։

Նրա խոսքով՝ հեռուստասերիալը պատմություն է  ընկերության ու  ստի մասին, բառեր, որ առաջին հայացքից չեն կարող գրվել  նույն նախադասության մեջ: «Տարիներ առաջ չգիտակցված դավաճանությունը, դառնում է այն թելը, որ կապում է ներկան անցյալին ու  անընդհատ ստիպում հետ նայել: Մենք սովոր ենք սուտն ու ճշմարտությունը բաժանել սևի ու սպիտակի, բայց       կյանքը հաճախ ապրում է այդ երկու գույների միջև։ Լինում են պահեր, երբ մի չասված ճշմարտություն կամ մեղմացված իրականություն մարդուն ժամանակ է տալիս ուժ հավաքելու, ցավին  դիմանալու,կամ նոր հարվածին դիմակայելու համար: Բայց նույնիսկ այն սուտը, որը ծնվում է բարի մտադրությունից, ունի իր գինը, որովհետև ճշմարտությունը վաղ թե ուշ պահանջում է իր տեղը։ Այդ պատճառով հարցը ոչ թե այն է, թե արդյոք սուտը կարող է փրկել, այլ այն, թե ինչ է այն փրկում և ինչ արժեքով»,- մանրամասնեց Անահիտ Մխիթարյանը:

Նախագծի պրոդյուսերը Ելենա Արշակյանն է,  ռեժիսորը՝ Գոհար Արշակյանը: Սցենարիստի խոսքով՝  նախագծում շատ հետաքրքիր ու սիրված դերասաններ են ներգրավված: «Առաջին անգամ աշխատելու ենք Վահագն Մարգարյանի հետ, հուսով եմ, որ մեր համագործակցությունը լավ արդյունք կտա: Հատուկ նախագծում նկարահանվելու համար Մոսկվայից ժամանել է նաև դերասան Հմայակ Հակոբյանը:

Դերասանական կազմում կտեսնեք նաև  Դավիթ Հարությունյանին, Մարիամ Դավթյանին,Նոնա Սաֆարյանին,  Ադրինե Աճեմյանին, Պավել Թադևոսյանին, Էրիկ Կրբաշյանին»:

Խոսելով սերիալի ձևաչափի մասին՝ նա նշեց, որ  այս անգամ հանդես են գալու նոր ձևաչափով, սերիալը կցուցադրվի Յութուբ հարթակում 12  րոպեանոց սերիաներով: «Ձևաչափը նոր է  հայկական մեդիատիրույթում, հուսով եմ՝  այս տարբերակը կընդունվի և կսիրվի»,- ամփոփեց Անահիտ Մխիթարյանը:

Ավելի վաղ, Tert.am Life-ի հետ զրույցում դերասանուհի Ադրինե Աճեմյանը խոսելով իր կերպարի մասին՝ նշել էր, որ կերպարը բոլորովին նման չէ իր նախորդ դերերին։ «Շատ խաղալու տեղ ունեմ։ Կերպարս հոգեբանական ծանր վիճակում գտնվող աղջիկ է, որը կանգնած է մեծ խնդրի առաջ։ Չեմ ուզում շատ բան ասել, բայց կարող եմ նշել, որ կինոյի դասական «չար աղջիկը» չէ»։