Գերմանիան Ուկրաինային կհատկացնի 200 մլն դոլար՝ «Ուկրաինայի համար ԱՄՆ-ից uպառազինnւթյան գնման ծրագրի» հերթական փաթեթի շրջանակներում

Գերմանիան 200 մլն դոլար կհատկացնի Ուկրաինային օգնության հերթական փաթեթին մասնակցելու համար՝ PURL գծով (Ուկրաինայի համար ԱՄՆ-ից սպառազինության գնման ծրագիր)։ Այս մասին լրագրողներին հայտարարել է Գերմանիայի պաշտպանության նախարար Բորիս Պիստորիուսը՝ ՆԱՏՕ-ի երկրների պաշտպանության նախարարների պլանային հանդիպմանը ժամանելուն պես, հաղորդում է ՏԱՍՍ-ը:

«Մենք հերթական անգամ՝ չորրորդ անգամ, կմասնակցենք PURL մեխանիզմի փաթեթին»,- ասել է նա։

«Այս դեպքում խոսքը, առաջին հերթին, հակաօդային պաշտպանության համակարգերի համար այդքան հրատապ անհրաժեշտ զինամթերքի մասին է»,- պարզաբանել է նախարարը։ «Այս անգամ մենք կմասնակցենք 200 մլն դոլարի չափով»,- հայտնել է Պիստորիուսը։

Պաշտպանության նախարարը նշել է, որ իր ուկրաինացի գործընկեր Միխայիլ Ֆեդորովը նույնպես խնդրել է աջակցել «JumpStart» ծրագրին, որի շրջանակներում նախատեսվում է կառավարվող հրթիռներ գնել «Patriot» ԶՀՀ-ի համար։

«Մենք հայտարարեցինք, որ պատրաստ ենք մասնակցել նաև դրան՝ 200 մլն դոլարի չափով՝ PAC-3 հրթիռների գնման համար»,- հայտնել է նա։

Ռուսական կողմը բազմիցս հայտարարել է, որ Կիևի ռեժիմին զենքի մատակարարումները միայն ձգձգում են Ուկրաինայում հակամարտությունը։