Ռուսաստան-Ուկրաինա հակամարտության նոր փուլ՝ փոխադարձ հարվածներ և զոհեր

Ռուսաստանն ու Ուկրաինան հայտնել են փոխադարձ ռազմական հարվածների մասին, որոնց հետևանքով երկու կողմում կան զոհեր և վիրավորներ։ ՌԴ պաշտպանության նախարարության տվյալներով՝ գիշերը խոցվել է ավելի քան 340 ուկրաինական անօդաչու թռչող սարք։

Մոսկվայի մարզի երկնքում խոցվել է 81 անօդաչու։ Պիոներսկի բնակավայրում անօդաչուի հարվածի հետևանքով զոհվել են 3 մարդ, կա վիրավորների թիվ։ Սոլնեչնոգորսկում և Մոժայսկում հարվածներ են հասցվել բազմաբնակարան շենքերին, որոնց հետևանքով 2 մարդ վիրավորվել է։ Բելգորոդի մարզում ևս կա 1 զոհ և 2 վիրավոր։

BBC-ի ռուսական ծառայության փոխանցմամբ՝ Ուկրաինայի զինված ուժերը Ստավրոպոլի երկրամասում հարվածել են նավթաբազային, իսկ Ազովի ծովում՝ 15 ռուսական նավ։

Ռուսական զինված ուժերը Ուկրաինայի ուղղությամբ արձակել են 3 կառավարվող ավիացիոն հրթիռ և 134 անօդաչու թռչող սարք։ Խերսոնում զոհվել են 2 մարդ, Զապորոժիեում ևս 2 զոհ կա, իսկ Օդեսայում կան 2 վիրավոր։ Ռուսական հարվածների հետևանքով Օդեսայի նավահանգստում բռնկվել է հրդեհ Տոգոյի դրոշով բեռնանավում, որտեղ զոհվել են 3 անձնակազմի անդամ, 5-ը վիրավորվել են։

Ուկրաինայի նախագահ Վոլոդիմիր Զելենսկին հայտարարել է, որ ռուսական ուժերը թիրախավորում են քաղաքացիական օբյեկտներ և ընդգծել է երկրի օդային պաշտպանության ուժեղացման անհրաժեշտությունը։ Նա նաև ընդգծել է Ռուսաստանի նկատմամբ պատժամիջոցների ճնշման ավելացման կարևորությունը։

Միաժամանակ, Եվրոպական Միության դիվանագիտության ղեկավար Կայա Կալասը նշել է, որ Մոսկվայի դեմ պատժամիջոցների 21-րդ փաթեթի շուրջ համաձայնություն դեռ չկա, սակայն քննարկվում է ևս 250 ֆիզիկական և իրավաբանական անձանց ընդգրկումը պատժամիջոցների ցանկում։