«Չելսին» ձմռանը 100 միլիոն եվրո կառաջարկի «Ատլետիկոյի» խաղացողի համար

Լոնդոնի «Չելսին» դիտարկում է Մադրիդի «Ատլետիկոյի» կիսապաշտպան Պաբլո Բարիոսին ձեռք բերելու տարբերակը: Ինչպես հաղորդում է իսպանական Sport.es պարբերականը, անգլիական ակումբը ցանկանում է տրանսֆերն իրականացնել գալիք ձմռանը և պատրաստ է 23-ամյա ֆուտբոլիստի համար վճարել տպավորիչ 100 միլիոն եվրո։

Աղբյուրի փոխանցմամբ՝ լոնդոնյան թիմի գլխավոր մարզիչ Խաբի Ալոնսոն երիտասարդ իսպանացուն համարում է դաշտի կենտրոնն ուժեղացնելու գլխավոր թիրախը՝ ակումբից հեռացած Էնցո Ֆերնանդեսին փոխարինելու նպատակով։ Սպասվում է, որ հունվարին «Չելսին» պաշտոնական առաջարկ կուղարկի մադրիդյան ակումբին։

Չնայած խոշոր առաջարկին՝ «Ատլետիկոյի» ղեկավարությունը չի շտապում վաճառել ֆուտբոլիստին։ Բարիոսի գործող պայմանագրի ժամկետը իսպանական ակումբի հետ նախատեսված է մինչև 2030 թվականի ամառ, իսկ նրա հրաժարագինը կազմում է աստղաբաշխական 500 միլիոն եվրո։

Նշենք, որ նախորդ մրցաշրջանում կիսապաշտպանը բոլոր մրցաշարերում մասնակցել է 35 հանդիպման՝ դառնալով 1 գոլի և 3 գոլային փոխանցման հեղինակ։ Transfermarkt պորտալի գնահատմամբ՝ Բարիոսի տրանսֆերային արժեքը ներկայումս կազմում է 55 միլիոն եվրո։

Հետևեք մեզ՝ այստեղ