Ազգերի լիգայի խաղարկության C լիգայի առաջին տուրի շրջանակում Հայաստանի ազգային հավաքականը հաղթեց Լատվիայի ընտրանուն

Այսօր՝ սեպտեմբերի 25-ին, Ազգերի լիգայի խաղարկության C լիգայի առաջին տուրի շրջանակում  Հայաստանի ազգային հավաքականը Երևանի Վազգեն Սարգսյանի անվան «Հանրապետական» մարզադաշտում ընդունեց Լատվիայի ընտրանուն։

Առաջին խաղակեսում, 31-րդ րոպեին, հանդիպման հաշիվը բացեց Գեորգի Հարությունյանը․ նա մրցակցի դարպասը գրավեց անկյունայինից կատարած փոխանցումից։ Գոլային փոխանցումն իր ակտիվում գրանցեց Էդուարդ Սպերցյանը։

Երկրորդ խաղակեսում՝ 76-րդ րոպեին, մեր թիմի առավելությունը կրկնապատկեց հավաքականում նորամուտը նշող Արթուր Ղարիբյանը, ով քիչ առաջ էր դուրս եկել փխարինման։

82-րդ րոպեին խաղադաշտ դուրս եկավ Էրիկ Սիմոնյանը՝ նորամուտը նշելով ազգային հավաքականւմ։ Նշենք նաև, որ Լատվիայի հավաքականի կազմում նորամուտը նշեց հայազգի ֆուտբոլիստ Ալբերտս Ալեքսանյանսը։

Հանդիպման մնացած ժամանակահատվածում այլևս գոլեր չգրանցվեցին։ Այսպիսով, Եղիշե Մելիքյանի թիմը հաղթանակով է մեկնարկում Ազգերի լիգայի 2026/27 մրցաշրջանը։ Հայաստանի հավաքականը ընդհատեց 7 խաղից բաղկացած առանց հաղթանակների շարքը, ինչպես նաև 40 հանդիպում անց թիմն անառիկ պահեց դարպասը։ Սա նաև առաջին հաղթանակն էր 2026 թվականին։

Հայաստանի, Լատվիայի, Չեռնոգորիայի և Կիպրոսի հավաքականներն ընդգրկված են 2-րդ խմբում։ Այս խմբի առաջին տուրի մյուս՝ Չեռնոգորիայի և Կիպրոսի միջև հանդիպումը կմեկնարկի քիչ անց։

Հիշեցնենք` Հայաստանի ազգային հավաքականը սեպտեմբերի 28-ին, ժամը 20։00-ին, կընդունի Չեռնոգորիայի հավաքականին, որից հետո արտագնա հանդիպումներ կանցկացնի Կիպրոսի ու Չեռնոգորիայի ընտրանիների հետ։

Հետևեք մեզ՝ այստեղ