Կոնվերս Բանկը՝ BACEE միջազգային բանկային համաժողովի գլխավոր հովանավոր

Կոնվերս Բանկը որպես գլխավոր հովանավոր (Lead Sponsor) կմասնակցի հոկտեմբերի 8-9-ը Վարշավայում կայանալիք Bank Pekao FI Day & 52nd BACEE International Banking Conference-ին՝ Կենտրոնական և Արևելյան Եվրոպայի բանկային ասոցիացիայի առանցքային միջազգային միջոցառումներից մեկին։

BACEE-ի և Bank Pekao-ի համատեղ համաժողովը մեկ հարթակում կհամախմբի միջազգային ֆինանսական կառույցների, տարածաշրջանի առաջատար բանկերի ղեկավարների և ոլորտի փորձագետների։ Քննարկումների առանցքում կլինեն բանկային ոլորտի զարգացման միտումները, միջազգային համագործակցության հնարավորությունները, առևտրի ֆինանսավորումը, ռիսկերի կառավարումը, թվայնացումը և ոլորտի այլ արդիական հարցեր։

Կոնվերս Բանկը համաժողովում ներկայացնելու են Ֆինանսական հաստատությունների և միջազգային բանկային հարաբերությունների վարչության ղեկավար Նելլի Քոչարյանը և Ներդրողների հետ հարաբերությունների և ռազմավարության բաժնի պետ Լուսինե Բալանյանը։ Նրանք կմասնակցեն նաև համաժողովի թեմատիկ քննարկումների։
Կոնվերս Բանկի գլխավոր գործադիր տնօրեն, տնօրինության նախագահ, BACEE-ի տնօրենների խորհրդի անդամ Հրանտ Հակոբյանն այս կապակցությամբ ասել է. «Միջազգային համագործակցությունը Կոնվերս Բանկի զարգացման կարևոր ուղղություններից է։ Մեզ համար այն առաջին հերթին հնարավորություն է` ընդլայնելու Բանկի միջազգային ներկայությունը և աջակցելու հայկական բիզնեսին նոր գործարար, ֆինանսական կապերի ստեղծման հարցում։

BACEE-ն այն հարթակներից է, որտեղ ձևավորվում և ընդլայնվում են այդ կապերը։ Ասոցիացիայի աշխատանքներում ակտիվ ներգրավվածությունը մեզ հնարավորություն է տալիս մասնակցելու միջազգային բանկային երկխոսությանը և ներկայացնելու Հայաստանը որպես վստահելի գործընկեր միջազգային ֆինանսական կառույցների համար»: 

Կոնվերս Բանկը հետևողականորեն ընդլայնում է միջազգային գործընկերային և թղթակցային բանկային հարաբերությունների ցանցը։ BACEE-ին անդամակցում և դրա աշխատանքներին ակտիվորեն ներգրավված է 2024թ-ից:
Կոնվերս Բանկը վերահսկվում է ՀՀ ԿԲ կողմից։