«Ափսոսում եմ, որ նրա դեմքին չհարվածեցի»․ Նեյմարը՝ «Մարսելի» խաղացողի հետ կոնֆլիկտի մասին

Բրազիլացի ֆուտբոլիստ «Փարիզ Սեն Ժերմենի» խաղացող Նեյմարը ասել է, որ չի զղջում Ֆրանսիայի առաջնության երրորդ տուրի խաղի ավարտին «Մարսելի» իսպանացի պաշտպան Ալվարո Գոնսալեսի հետ բախում ունենալու համար: Կիրակի օրը տեղի ունեցած «ՊՍԺ»֊«Մարսել» հանդիպման ավարտին, երբ հյուրերը 1: 0 հաշվով հաղթանակ տարան, դաշտում սկսվեց զանգվածային ծեծկռտուք, որի արդյունքում՝ մրցավարը կարմիր քարտեր ցույց տվեց Նեյմարին, ինչպես նաև Լևան Կուրզավային և Լեանդրո Պարեդեսին՝ ՊՍԺ-ից, և Ջորդան Ամավիին ու Դարիո Բենեդետտոյին՝ «Մարսելից»: Լրատվամիջոցների հաղորդմամբ՝ հանդիպման ընթացքում Նեյմարը մի քանի անգամ դիմել է մրցավարին «ոչ մի ռասիզմ» բառերով՝ մատնացույց անելով Գոնսալեսին: Երկրորդ խաղակեսին ավելացված ժամանակին խաղացողները հայհոյել են միմյանց, որից հետո Նեյմարը հարվածել է իսպանացու գլխի հետևի մասին, ինչի համար ավելի ուշ ստացել է կարմիր քարտ: «Միակ բանը, որի համար ափսոսում եմ, այն է, որ նրա դեմքին չհարվածեցի: Նա ինձ կապիկ կոչեց։ Դա ռասիզմ է: Այս ի՞նչ է կատարվում», - գրել է Նեյմարը Թվիթերի իր միկրոբլոգում:
Գոնսալեսն իր հերթին նշել է, որ խաղադաշտում ռասիզմի դրսևորում չկար:
«Ռասիզմ չկար: Երբեմն պետք է սովորել կորցնել և ընդունել այդ կորուստը խաղադաշտում», - գրել է Գոնսալեսը Թվիթերի իր էջում: