Ոստիկանները սրճեփ սարքերից կատարված գողություններ են բացահայտել. Գողը 21 տարեկան է

Հունվարի լույս 7-ի գիշերը գիշերային շրջիկ ծառայություն իրականացրած Էրեբունու բաժնի քրեական հետախույզները, իրացնելով օպերատիվ տվյալները, գողություն կատարելու կասկածանքով, Նար-Դոսի և Խորենացու փողոցների խաչմերուկից բաժին բերման ենթարկեցին 21-ամյա երիտասարդի, որը Երևանի բնակիչ է։

Ոստիկանությունից NEWS.am-ին հայտնում են, որ նրա անձնական խուզարկությամբ հայտնաբերվեց սրճեփ սարքի մետաղադրամներ ընդունող սարք ու մետաղադրամներ։ Հետագա միջոցառումներով պարզվեց, որ երիտասարդը բերման ենթարկվելուց րոպեներ առաջ թալանել էր Նար-Դոսի փողոցի 27 հասցեի մոտ տեղադրված սրճեփ սարքը։ Օպերատիվ-հետախուզական միջոցառումները շարունակվեցին։ Արդյունքում` փաստական տվյալներ ձեռք բերվեցին, որ բերման ենթարկված երիտասարդը, բացի հիշյալ դեպքից, անցած տարվա նոյեմբեր-դեկտեմբեր ամիսներին գողություններ էր արել նաև Էրեբունու, Գլինկայի, Խորենացու և Նար-Դոսի փողոցներում տեղադրված այլ սրճեփ սարքերից՝ տերերից յուրաքանչյուրին պատճառելով մի քանի տասնյակ հազար դրամի վնաս։