Խոշոր ավտովթար Արագածոտնի մարզում. բախվել են Audi-ն ու Mercedes-ը. կան վիրավորներ

Այսօր՝ հունվարի 15-ին, խոշոր ավտովթար է տեղի ունեցել Արագածոտնի մարզում:
 
Ժամը 14:30-ի սահմաններում, Երևան-Գյումրի-Բավրա ավտոճանապարհի 73 կմ հատվածում, բախվել են Շիրակի մարզի բնակիչ, 26-ամյա Մհեր Երեմյանի վարած Audi մակնիշի և Երևանի բնակիչ, 25-ամյա Անդրեյ Քամալյանի վարած Mercedes մակնիշի ավտոմեքենաները:
 
Ինչպես հայտնում է ֆոտոլրագրող Գագիկ Շամշյանը, վթարի հետևանքով Ա. Քամալյանի ուղևորներ, Արմավիրի մարզի բնակիչ, 35-ամյա Սուզաննա Ներսիսյանը և Վրաստանի Հանրապետության քաղաքացիներ, 52-ամյա Ալլա Քամալյանն ու 17-ամյա Գոհար Հ.-ն մարմնական վնասվածքներով տեղափոխվել են «Թալին» բժշկական կենտրոն:
 
Օպերատիվորեն ժամանել են Արտակարգ իրավիճակների նախարարության Փրկարար ծառայության Թալինի թիվ 22 հրշեջ-փրկարարական ջոկատից 1 մարտական հաշվարկ:
 
Փրկարարները հոսանքազրկել են ավտոմեքենաները, փակել գազաբալոններն ու սահմանազատել տարածքը:
 
Օպերատիվորեն ժամանել են նաև Ճանապարհային ոստիկանության 2-րդ սպայական գումարտակի 2-րդ վաշտի 1-ին դասակի ծառայողները՝ վաշտի հրամանատար Վաչե Մալաքյանի, դասակի հրամանատար Հրանտ Գալստյանի գլխավորությամբ:
 
Տեղում հետաքննական աշխատանքները ղեկավարել է նույն վաշտի ավագ հետաքննիչ Անուշավան Աղաջանյանը, ում կողմից փաստի առթիվ նյութեր են նախապատրաստվում:
 
Վթարի մասին ՃՈ 1-77 օպերատիվ կառավարման կենտրոնի պատասխանատու հերթապահ Երվանդ Ալեքսանյանը տեղեկությունը փոխանցել է ոստիկանության Թալինի բաժին, որտեղից ժամանել է օպերատիվ խումբը՝ բաժնի պետ Վահան Նասոյանի գլխավորությամբ:
 
Գ. Շամշյանի տեղեկություններով, վարորդներից Մ. Երեմյանը ծառայում է ՀՀ ՊՆ N զորամասում:
 
 
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: