Ուրախ եմ, որ Կառավարությունը փոխել է իր դիրքորոշումը. Թագուհի Թովմասյան

Թագուհի Թովմասյանը ֆեյսբուքյան իր էջում գրում է՝

Դեռ պատերազմի օրերին Արծրուն Հովհաննիսյանը հայտարարեց, որ մեր հերոսներից մեկը՝ Հովհաննես Ասատրյանը, քաջություններ է արել, և իր մայրիկին պիտի շնորհակալություն հայտնենք։ Հետո պարզվեց, որ Հովհաննես Ասատրյանը երկկողմանի ծնողազուրկ է և անհետ կորած։ Այդ օրվանից սկսած ընտանիքի կողքին եմ եղել, հետո հայտնաբերվեց հերոսի մոխրացած մարմինը։

Որքան էլ զարմանալի կարող է թվալ, քաջագործություններ իրականացրած, իր կյանքը հայրենիքի համար զոհած և երկկողմանի ծնողազուրկ զինծառայողի եղբայրները չէին կարողանում «Զինծառայողների ապահովագրության» հիմնադրամից ստանալ հատուցում․ օրենքով նախատեսված դրույթը բացակայում էր։ Կառավարության հետ գրավոր և բանավոր ձևաչափով շարունակ փորձում էի նրա 2 եղբայրների շահառու դառնալու խնդիրը կարգավորել և անընդհատ ստանում էի պատասխան, որ եղբայրներն ունեն ոտք ու ձեռք, թող աշխատեն։

Ուրախ եմ, որ Կառավարությունը փոխել է իր դիրքորոշումը, և այսօր ԱԺ-ում ընդունված «Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրենքում լրացումներ կատարելու մասին իշխանական խմբակցության պատգամավոր Հայկ Սարգսյանի հեղինակած օրենքի նախագծով հնարավորություն ենք տալիս, որ զոհված և երկկողմանի ծնողազուրկ մեր զինծառայողների եղբայրը/քույրը, պապը/տատը կարողանան դառնալ շահառու և օգտվել համապատասխան հատուցումից։