ՍԴ-ն Ալեն Սիմոնյանի՝ ԱԺ նախագահ ընտրվելը հակասահամանադրական ճանաչելու հարցով բողոքը քննելու է դռնբաց ռեժիմով

Սահմանադրական դատարանն Ալեն Սիմոնյանի՝ Ազգային ժողովի նախագահ ընտրվելու որոշումը հակասահմանադրական ճանաչելու հարցով «Հայաստան» եւ «Պատիվ ունեմ» խմբակցությունների բողոքը քննելու է դռնբաց ռեժիմով։ Այս մասին NEWS.am-ի հետ զրույցում հայտնել է «Հայաստան» խմբակցության պատգամավոր Արամ Վարդեւանյանը։

«Ազգային ժողովը՝ որպես պատասխանող կողմ, միջնորդել էր, որպեսզի հետաձգվի նիստը։ Անկանկալ էր, թե ինչով էր դա պայմանավորված։ Սահմանադրական դատարանը նիստը հետաձգելու միջնորդությունը բավարարել է, եւ նշանակել է մինչեւ ապրիլի 5-ը։ Այդ օրը բանավոր ընթացակարգով կլինի քննությունը»,- նշեց Վարդեւանյանը։

Պատգամավորի դիտարկմամբ՝ ԱԺ ներկայացուցչի պատճառաբանությունները՝ նիստը հետաձգելու հետ կապված անհասկանալի են. «Ես այդտեղ հիմքեր չէի տեսնում։ Կողմերը լիարժեք պատրաստ էին։ Հետաձգումը նույնպես անհասկանալի էր»։