Արտակարգ իրավիճակ Շիրակի մարզում․ Արտագնա աշխատանքի մեկնողներն անհանգիստ են

Շիրակի մարզից Ռուսաստանի Դաշնություն՝ արտագնա աշխատանքի մեկնող տղամարդիկ անհանգիստ են: Տոմսերը գնելու, ճամպրուկները հավաքելու ժամանակն է, սակայն խնդիրներ են ծագել. մարզի բուժհաստատություններում, մասնավորապես՝ Ախուրյանի բժշկական կենտրոնում և Ազատանի պոլիկլինիկայում, «Սպուտնիկ Վի» տեսակի պատվաստանյութ չկա:

Ախուրյանի բժշկական կենտրոնի տնօրեն Զավեն Մանուկյանը «Հայկական ժամանակ»-ի հետ զրույցում հաստատեց քաղաքացիների ասածն ու նշեց, որ արդեն մեկ շաբաթ է՝ չունեն «Սպուտնիկ Վի»: Այս պահին այն հասանելի է միայն առաջին դեղաչափն ստացածների համար:«Եթե առաջին դեղաչափն ստացած մարդը գա, երկրորդն ունենք, կպատվաստենք, սակայն առաջինը հիմա չունենք: Երևի մի շաբաթ եղավ արդեն, որ չկա, վերջացել է: Դեռ չեն հատկացրել, բայց հնարավոր՝ այսօր կամ երկուշաբթի արդեն կհատկացվի. ՀՎԿԱԿ-ին ենք դիմել»,- մեզ հետ զրույցում ասաց Մանուկյանը:

Ազատանում ընդհանրապես չկա «Սպուտնիկ Վի» տեսակի պատվաստանյութ:

«Ամբուլատորիայում հաստատեցին, որ նման խնդիր կա, այս պահին չունեն «Սպուտնիկ Վի»: Սպասում են, իրենցից կախված չէ, երբ հատկացրին, կպատվաստեն: Մարդիկ ցանկություն ունեն դրանով պատվաստվելու, քանի որ գնալու են Ռուսաստան, այնտեղ էլ դա են ընդունում: Հիմա այդ նախապատրաստությունների մեջ են, ու այս խնդիրը կա»,- ասաց Ազատանի վարչական ղեկավար Գագիկ Պողոսյանը:

Թե ինչո՞ւ Շիրակի մարզում չկա «Սպուտնիկ Վի» պատվաստանյութ ՀՀ առողջապահության նախարարությունը մեր հարցին ի պատասխան՝ վստահեցրեց՝ չափաքանակը բաշխված է:

«Պարբերաբար սպառվում է պատվաստանյութը, հայտերի հիման վրա իրականացվում է բաշխումը: Այս պահին երկուսն էլ ստացել են, կարող են մարդիկ գնալ, ստանալ»,- տեղեկացրեց նախարարության պատասխանատուն:

Հարցին՝ եթե «Սպուտնիկ Վի» պատվաստանյութի նոր խմբաքանակը հատկացրել է, ապա ինչո՞ւ այն բուժհաստատություններ չի հասել: Նախարարությունից պարզաբանեցին՝ գուցե ներքին բաշխման խնդիր է:

Ախուրյանի բժշկական կենտրոնի տնօրենն էլ նշեց՝ հավանաբար ՀՎԿԱԿ-ին են տրամադրել, մինչև իրենցից էլ հասնում է պոլիկլինիկաներին, մեկ-երկու օր ուշանում է գործընթացը: