Լեհաստանին մեկ միլիոն փախստական է սպասում Ուկրաինայից

Ուկրաինա ռուսական զորքերի լայնածավալ ներխուժման դեպքում Լեհաստանի հետ սահմանին կարող է սպասվել մինչև մեկ միլիոն փախստականների ալիք։ Այս մասին հայտարարել է Լեհաստանի ներքին գործերի և վարչակազմի փոխնախարար Մասեյ Վոնսիկը, հաղորդում է Լեհական ռադիոն շաբաթ օրը՝ հունվարի 29-ին։

«Եթե խոսքը վերաբերում է Ուկրաինայում պատերազմին, ապա մենք պետք է հաշվի առնենք իրական փախստականների հոսքը, մարդիկ, ովքեր փախչում են կրակից, մարդիկ, ովքեր փախչում են մահից, ովքեր փախչում են պատերազմի վայրագություններից», - ասել է Վոնսիկը:

Նա հավելել է, որ Լեհաստանը պետք է պատրաստ լինի ամենավատ սցենարին։

«Սցենարները մի քանիսն են, միգուցե ավելի դրական կամ ոչ այնքան արմատական սցենարներ իրականանան, բայց մենք պետք է պատրաստ լինենք սև սցենարի, և արդեն որոշ ժամանակ է` ՆԳՆ-ն միջոցներ է ձեռնարկում, որպեսզի պատրաստ լինենք այս անգամ մեկ միլիոնանոց ալիքին»,- ասել է նա։

Մասեյ Վոնսիկը հավելել է, որ խոսքը տեղափոխումների, բժշկական օգնության, կեցության և սննդի նախապատրաստման մասին է։

«Ըստ Ժնևյան կոնվենցիայի՝ այդ մարդիկ լինելու են Լեհաստանի պաշտպանության ներքո, և մենք դրանից չենք հեռանա, որտեղ փախստականներ կան, մենք պետք է օգնենք նրանց, այդպիսին է միջազգային իրավունքը, բայց դրանք նաև քաղաքակիրթ մարդկանց համակեցության կանոններն են, եվրոպական և քրիստոնեական մշակույթի սկզբունքները։ Մենք դրանից չենք փախչի և չենք պաշտպանվի դրանից»,- ասել է ՆԳՆ ղեկավարի տեղակալը։

Նա նաեւ հորդորել է խուճապի մեջ չընկնել եւ հիշեցրել, որ առջեւում Պեկինի օլիմպիական խաղերն են։

«Պուտինն այնքան կարևոր հարաբերություններ ունի Չինաստանի հետ, որ մինչև Օլիմպիական խաղերի ավարտը ոչ մի որոշիչ քայլ չի ձեռնարկի, քանի որ դա կարող է չինական կողմին շուռ տալ իր դեմ»,- ասել է նա։