Reuters. Մոսկվայում Մակրոնը հանդիպել է ուրիշ, ավելի կոշտ Պուտինի հետ

Ռուսաստանի նախագահ Վլադիմիր Պուտինը ֆրանսիացի գործընկեր Էմանուել Մակրոնի հետ ուկրաինական ճգնաժամի շուրջ իր մարաթոնյան բանակցությունների մեծ մասն անցկացրել է ներկայացնելով «սառը պատերազմի» ավարտից հետո ծագած պահանջները, հայտնում է Reuters-ը՝ հղում անելով Ֆրանսիայի առաջնորդին մոտ կանգնած աղբյուրներին:

Աղբյուրները հայտնել են, որ Մակրոնին ապշեցրել է, թե որքան է Պուտինը տարբերվում է այն մարդուց, ում հանդիպել էր երեք տարի առաջ ֆրանսիական Ռիվիերայի իր ամառային նստավայրում:

«Պուտինը հինգ ժամ զբաղվել է պատմական ռեւիզիոնիզմով»,- ասել է երկու աղբյուրներից մեկը՝ նկարագրելով, թե ինչպես է կրեմլյան առաջնորդը հայտարարել, որ Արեւմուտքը 1997 թվականից խախտել է Ռուսաստանի հանդեպ իր պարտավորությունները՝ նախկին խորհրդային բլոկի պետությունների հաշվին ՆԱՏՕ-ի ընդլայնման պատճառով: «Այսպիսով, նա ժամերով վերաշարադրել է պատմությունը 1997 թվականից: Նա խեղդում է ձեզ այս երկար մենախոսությունների մեջ։ Իսկ նախագահը (Մակրոնը) անընդհատ վերադարձել է օրախնդիր հարցերին»,- ասել է աղբյուրը:

«Հինգ ժամ տեւած այս բանակցությունները մեզ ստիպում են հասկանալ, թե որքան է այսօր Պուտինը տարբերվում երեք տարի առաջվա Պուտինից»,- ասել է աղբյուրը, ով տեղեկացված է եղել Մակրոն-Պուտին բանակցությունների բովանդակության մասին եւ խոսել է անանուն մնալու պայմանով։

Մակրոնի համար հանդիպումը երկար ժամանակ Պուտինի ընկերակցությամբ անցկացնելու եւ նրա հոգեվիճակը անձամբ գնահատելու հազվագյուտ հնարավորություն էր։

Բանակցությունների ընթացքում Ֆրանսիայի ղեկավարը Պուտինի հետ մենակ է եղել՝ առանց օգնականների եւ միայն թարգմանչի հետ։

Ֆրանսիական առաջին աղբյուրի համաձայն՝ Պուտինը բազմիցս վերադարձել է ՆԱՏՕ-ի 1997 թվականի համաձայնագրին, որը դաշինքին միանալու ճանապարհ է հարթել նախկին խորհրդային բլոկի երեք երկրների՝ Լեհաստանի, Հունգարիայի եւ Չեխիայի համար:

Աղբյուրները նշում են, որ Պուտինը այդ համաձայնագիրն անվանել է դավաճանություն դաշինքի չընդլայնվելու նախկին խոստումներին: ՆԱՏՕ-ի անդամները հերքում են, որ երբեւէ նման խոստումներ են տվել:

Պուտինն անդրադարձել է նաեւ «2014 թվականի մայդանի հեղափոխությանը»։ «Նա ասել է, որ դա հեղաշրջում էր, եւ որ Զելենսկին վերահսկվում է ԱՄՆ-ի կողմից»,- ասել է առաջին աղբյուրը։

Ըստ երկրորդ աղբյուրի, բանակցություններից հետո Մակրոնն իր թիմին ասել է, որ երբ 2019-ին հյուրընկալել էր Պուտինին Ֆրանսիայում, կրեմլյան առաջնորդը թվացել էր «ավելի քիչ կոշտ եւ ավելի քիչ կենտրոնացած պատմության վրա», քան այս անգամ: