Դանիայի առողջապահական մարմինները քննարկում են կորոնավիրուսի դեմ պատվաստումների դադարեցումը

Դանիայի առողջապահական մարմինները քննարկում են կորոնավիրուսի դեմ պատվաստումների դադարեցումը եւ պատճառ չեն տեսնում այս պահին երեխաներին կամ այլ բնակիչների բուստերային դեղաչափ ներարկելու համար, գրում է AP-ը:

Դանիայի առողջապահության վարչությունը հայտնել է, որ եվրոպական երկրում վարակի երրորդ ալիքը նվազում է «բնակչության շրջանում բարձր իմունիտետի շնորհիվ»։

«Դանիայում պատվաստումների բարձր մակարդակը, հատկապես երրորդ դեղաչափով պատվաստումը, նշանակում է, որ մենք կարող ենք հաղթահարել վարակի թվի աճը՝ առանց լուրջ հիվանդանալու»,- ասվում է հայտարարության մեջ։

Անցյալ ամիս Դանիայի կառավարությունն առաջարկել է պատվաստանյութի չորրորդ դեղաչափը տարեցներին եւ խոցելի խմբերի այլ քաղաքացիներին, քանի որ պանդեմիայի հետ կապված իրավիճակը վատթարացել է օմիկրոն շտամի արագ տարածման պատճառով։  

Սակայն  առողջապահության վարչությունը եզրակացության է եկել, որ երեք դեղաչափերն ապահովում են լավ պաշտպանություն ծերանոցի բնակիչների եւ 85-ից բարձր մարդկանց համար, եւ որոշել են, որ լրացուցիչ պատվաստումների կարիք չկա։    

Դանիան նոյեմբերին ընդլայնել է իր պատվաստումների ծրագիրը 5-ից 11 տարեկան երեխաների համար, երբ դելտա շտամը գերիշխող էր, եւ մտավախություն կար, որ երիտասարդները կարող են վարակել ավագ սերնդին: Ուրբաթ օրը առողջապահական մարմինները հայտնել են, որ «այժմ սկսում են ծրագրել պատվաստումների ընթացիկ ծրագրի ավարտը բոլոր թիրախային խմբերի համար, ներառյալ 5-11 տարեկան երեխաների համար ծրագիրը»:  

«Իհարկե, մենք ուշադիր հետեւելու ենք համաճարակին եւ պատրաստ ենք փոխել մեր որոշումը, եթե, հակառակ ակնկալիքների, այս գարնանը չորրորդ ալիք կամ նոր մտահոգիչ տարբերակներ լինեն»,- ասվում է գործակալության հայտարարության մեջ: 

Դանիան այս ամիս չեղարկել է համաճարակի հետ կապված սահմանափակումների մեծ մասը այն բանից հետո, երբ պաշտոնյաները հայտնել են, որ իրենք այլեւս COVID-19-ը չեն համարում «սոցիալապես ճգնաժամային հիվանդություն»: