Հայտնաբերվել է թմրամիջոցի վերամշակման «լաբորատորիա». Ապագա գյուղի 38-ամյա բնակիչը ձերբակալվել է

Փետրվարի լույս 13-ի գիշերը ոստիկանության Արաբկիրի բաժնի քրեական հետախույզներն ու համայնքային ոստիկանները Կորեայի ձորում հետապնդել են «Օպել» մակնիշի մի ավտոմեքենա. տեղեկություններ են ունեցել, որ ուղևորի մոտ թմրանյութ կա:

Այս մասին տեղեկացնում է Ոստիկանության լրատվական բաժինը:

Ստուգման նպատակով մեքենան կանգնեցնելու պահին 38-ամյա ուղևորը, որ Ապագա գյուղի բնակիչ է, փաթեթներ է նետել: Դեպքի վայրի զննությամբ ոստիկանները հայտնաբերել են 5 փաթեթ՝ 100 գրամից ավելի մեթամֆետամինի նմանվող բյուրեղանման զանգվածով, իսկ կասկածվողի անձնական խուզարկությամբ՝ ծալովի դանակ:

38-ամյա տղամարդը և տաքսու վարորդը, մեքենայով հանդերձ, բերման են ենթարկվել ոստիկանության Արաբկիրի բաժին: Դեպքի առթիվ հարուցվել է քրեական գործ: 38-ամյա տղամարդը ձերբակալվել է։

Ոստիկանության ու Քննչական կոմիտեի ծառայողները խուզարկել են Ներքին Շենգավիթի 4-րդ փողոցի տներից մեկը, որտեղ փաստացի բնակվելիս է եղել ձերբակալվածը:

Իրավապահները հայտնաբերել են 1 կգ 100 գրամից ավելի սպիտակավուն և 30 գրամից ավելի՝ վարդագույն զանգվածներ, որոնք, ըստ 38-ամյա տղամարդու, մեթամֆետամին ու էքստազի թմրամիջոց են եղել: Հայտնաբերվել է նաև 70 գրամ այլ զանգված, որը, նախնական տվյալներով, «PVP» տեսակի թմրամիջոց է եղել:

Իրավապահները հայտնաբերել են նաև թմրամիջոցի վերամշակման և իրացման համար նախատեսված տարբեր միջոցներ և առարկաներ, այսպես ասած՝ թմրամիջոցի վերամշակման «լաբորատորիա»: Նշանակվել են փորձաքննություններ:

Հարուցված քրեական գործի նախաքննությունը շարունակվում է: