Բժիշկները երբեմն չեն ուզում աշխատել. վերջին շրջանում Շտապօգնության անձնակազմի հանդեպ բռնության դեպքերը շատացել են

Վերջին շրջանում հաճախ են արձանագրվում դեպքեր, երբ կանչով մեկնած Շտապօգնության բժշկական անձնակազմի հանդեպ որոշ քաղաքացիներ ցուցաբերում են ոչ հարգալից վերաբերմունք: Երբեմն անգամ բանը հասնում է հայհոյանքների, քաշքշոցների և բռնության գործադրման:

Շատերն արդարանում են՝ պատճառաբանելով, թե հուզմունքը կամ լարվածությունն են պատճառ դառնում նման վարքագծի դրսևորման:

Բոլորովին վերջերս էլ նմանօրինակ մի դեպք էր գրանցվել Վարդաշեն թաղամասի Վարդաշեն 5-րդ փողոցի 34 հասցեում, երբ Շտապօգնության կանչով ժամանած բժշկի և բուժքրոջ հանդեպ բռնություն էին գործադրել պացիենտն ու նրա հայրը: Պատճառն այն էր եղել, որ նա հրաժարվել էր տեղափոխվել հիվանդանոց: Տանտերը բռունցքով հարվածել էր բժշկին, հետո ձեռքի փայտով՝ գլխին: Իսկ տանտիրոջ որդին ձեռքով և փայտով հարվածել էր բժշկի ծոծրակին՝ պատճառելով ֆիզիկական ցավ, ապա պատռել վերջինիս բաճկոնը, այնուհետև ձեռքով և փայտով հարվածել Շտապօգնության ավտոմեքենային։ Հարվածների և հրմշտոցների ժամանակ տուժել էր նաև բուժքույրը:

Շտապօգնության տնօրեն Թագուհի Ստեփանյանը «Հայկական ժամանակ»-ի հետ զրույցում ևս հաստատում է, որ վերջին շրջանում կարծես ավելի շատ են գրանցվում դեպքեր, երբ կանչով գնացած բուժանձնակազմի հանդեպ մարդիկ բռնություն են գործադրում: Սա, Ստեփանյանի կարծիքով, մշակութային խնդիր է: Իրականություն, որի հետ ամեն օր առնչվում է Շտապօգնության բուժանձնակազմը:

«Հասարակությունն ինքն իրենով պետք է փոխվի, իր մտածելակերպով: Պետք է բուժաշխատողների հանդեպ անհարկի տրամադրվածությանը վերջ տա: Հասարակությունը պետք է գիտակցի, որ պահեր կան, երբ այդ բուժանձնակազմի կողմից արագ տրամադրվող օգնությունից է կախված մարդկանց կյանքը: Բռնությունը յուրաքանչյուրի հանդեպ՝ դա կլինի բժիշկ, բուժքույր, թե այլ անձ, անթույլատրելի է»,- նշում է Ստեփանյանը

Նրա խոսքով՝ Շտապօգնության բուժանձնակազմը աշխատանքի բերումով հանդիպում է տարբեր տեսակի մարդկանց, սակայն դա չի նշանակում, թե որևէ մեկը կարող է և իրավունք ունի նվաստացնել բժշկին կամ անձնակազմի որևէ անդամի:

«Երբեմն մարդիկ բժիշկներին չեն դիտարկում որպես իրենց օգնություն ցուցաբերողի, այլ իրենց հասկացողության շրջանակում՝ որպես անձնավորության, ում հանդեպ կարող են բռնություն գործադրել: Դա էլ գալիս է նրանից, քանի որ խիստ պատիժներ չկան, որոնք մարդկանց կստիպեն զերծ մնալ նման արարքներից»,- նկատում է զրուցակիցը:

Շտապօգնության տնօրենը վերհիշում է մի դեպք ևս, երբ բժիշկը հիվանդի կյանքի համար պայքարելիս արժանացել է ոչ թե շնորհակալության, այլ վիրավորական խոսքերի. «Մի քանի օր առաջ կանչով գնացել էինք ռեստորան, հիվանդը շատ ծանր վիճակում է եղել, զարկերակն էլ չի եղել, կարիք է եղել ռեանիմացիա տեղափոխելու: Այսինքն՝ նա կյանքի ու մահվան խաչմերուկում է գտնվել: Հիվանդը շատ նեղ շոր է հագած եղել, պետք է եղել երակային ներարկում անել, և դրա համար բժիշկը պատռել էր հագուստը: Երբ հիվանդը գիտակցության էր եկել, վիրավորել էր բժշկին՝ շնորհակալ լինելու փոխարեն»:

Թագուհի Ստեփանյանի կարծիքով՝ որևէ պատճառ չի կարող լինել, որը կարող է ստիպել, որ բուժանձնակազմի հանդեպ ցուցաբերվի անհարգելից վերաբերմունք, առավել ևս՝ գործադրվի բռնություն:

«Երբեմն վարորդն ու բժիշկը չեն արձագանքում, բայց դա ուղղակի անթույլատրելի իրավիճակ է: Մարդիկ եկել են քեզ օգնելու, դու նստում ու փայտով խփում ես բժշկին: Ճիշտ է, օրենք կա, դու կարող ես դիմել, պատասխանատվության ենթարկեն, սակայն մարդկանց գիտակցության մեջ պետք է լինի, որ չի կարելի նման վարքագիծ դրսևորել: Մենք նման դեպքերում անպայման ահազանգում ենք Ոստիկանություն: Հասարակությունն էլ իր հերթին պետք է ցույց տա, որ բռնությունը բոլոր պարագաներում անընդունելի է»,- ընդգծում է նա:

Շտապօգնության տնօրենն ասում է՝ նման դեպքերի հետևանքով տարիներ առաջ երկու լավ մասնագետներ դուրս են եկել աշխատանքից, քանի որ այլևս չեն ցանկացել իրենց աշխատանքը շարունակել վեճերի ու անշնորհակալ վերաբերմունքի պայմաններում: Ըստ նրա՝ երբեմն բժիշկները հիասթափվում են իրենց աշխատանքից, քանի որ գնում են անձին օգնելու, նրա կյանքի համար պայքարելու, այլ ոչ թե վիրավորանքի ու բռնության ենթարկվելու:

«Մարդիկ պետք է հասկանան, որ օգնության եկած բուժանձնակազմի հանդեպ նման վերաբերմունք դրսևորելը սխալ է: Յուրաքանչյուրն իր կյանքում ունի որոշակի խնդիրներ, բայց դա շրջապատի վրա տարածելն էգոիստություն է»,- շեշտում է Շտապօգնության տնօրենը: