Հայաստանը միացել է Թուրքայի և Ադրբեջանի կողմից առաջ մղված «3+3» անհասկանալի հարթակին. Հռիփսիմե Ստամբուլյան

Հռիփսիմե Ստամբուլյանը ֆեյսբուքյան իր էջում գրում է.

ՔՊ պատգամավորները ՀՀ ԱԺ արտաքին հարցերի մշտական հանձնաժողովի նիստին չմիացան «Հայաստան» խմբակցության հեղինակած հայտարարության նախագծին, որը վերաբերում է Ադրբեջանի և Թուրքիայի խորհրդարանների կողմից «Շուշիի հռչակագրի» վավերացմանը:

Որպես մերժման հիմնավորում՝ իշխող ուժը ներկայացնում է վերոնշյալ հռչակագրի ստորագրմանը հաջորդած ՀՀ ԱԳՆ-ի կողմից հրապարակված հայտարարության գոյության փաստը՝ ըստ էության անիմաստ համարելով նույնաբովանդակ հայտարարության կրկնությունն ԱԺ-ի կողմից:

ՄԵՋԲԵՐՈՒՄ 2021թ. հունիսի 17-ին ՀՀ ԱԳՆ պաշտոնական կայքում տեղադրված «ՀՀ ԱԳՆ մեկնաբանությունը Թուրքիայի և Ադրբեջանի նախագահների կողմից ստորագրված հռչակագրի առնչությամբ» խորագրով հայտարարության տեքստից.

«Նման հայատյացության համատեքստում տարածաշրջանային համագործակցության պլատֆորմ ստեղծելու Ադրբեջանի խորհրդարանում հնչեցված Թուրքիայի նախագահի առաջարկները երեսպաշտ և ապակողմնորոշող են»:

ՀԻՇԵՑՈՒՄ !!!

• Հայաստանը Թուրքիայի հետ գտնվում է հարաբերությունների կարգավորման գործընթացի մեջ հատուկ ներկայացուցիչների մակարդակով:

• Հայաստանը միացել է Թուրքայի և Ադրբեջանի կողմից առաջ մղված «3+3» անհասկանալի հարթակին:

Հարց.

Արդյո՞ք միայն Թուրքիայի նախագահի կեցվածքն է երեսպաշտ ու ապակողմնորոշող…