Մհեր Գրիգորյան. Հայաստանից Հորադիզ երկաթուղին կարող է 5 տոկոսի չափով շահութաբերություն ապահովել

Հայաստանից Նախիջեւանով, Մեղրիով եւ Հորադիզով երկաթգիծը, նախնական հաշվարկներով, կարող է 5 տոկոսի չափով շահութաբերություն ապահովել։ Այս մասին մարտի 2-ին Ազգային ժողովի նիստում կառավարության հետ հարցուպատասխանի ժամին հայտարարեց փոխվարչապետ Մհեր Գրիգորյանը՝ պատասխանելով «Հայաստան» խմբակցության պատգամավոր Արթուր Խաչատրյանի հարցին։

Նրա խոսքով՝ հասկանալու համար, թե ձեռնտու է արդյոք այս երկաթուղու վերականգնումը, պետք է գոնե հաշվարկել ինդիկատիվ շահութաբերությունը։ «Դրանից հետո հնարավոր կլինի ավելի մանրամասն գնահատական տալ։ Հիմա, երբ շրջափակումը չի վերացվել, Հայաստանի երկաթուղով տարեկան տեղափոխվում է մոտ 3 մլն տոննա, որից 2 մլն տոննան ներքին փոխադրումներն են։ «ՀԿԵ»-ի հարկային եկամուտները կազմում են մոտ 4,7 մլրդ դրամ։ Սա տարեկան մոտ 10 մլն դոլար է»,- ասաց Գրիգորյանը։

Այսպիսով, եթե այդ բեռնահոսքերը առնվազն երկու անգամ ավելանան, ապա երկաթուղին կհասնի 5 տոկոսանոց շահութաբերության մակարդակի։ Սա, ըստ փոխվարչապետի, լավ ցուցանիշ է, որը թույլ է տալիս հաջորդ փուլում անցնել խորքային հաշվարկների։ «Պետք է հասկանալ, թե որքան շուտ բեռնափոխադրողներն իրենց երթուղիներում կներառեն նոր երկաթուղին։

Բայց ինչ էլ լինի, վստահ եմ, որ շահութաբերության ավելի լավ թվեր կստանանք։ «Ռուսական երկաթուղիներ»-ի փորձագետներն ավելի լայն տեսլական ունեն բեռնափոխադրումների գործընթացի վերաբերյալ։ Եվ ոչ միայն մեր տարածաշրջանում, այլեւ Չինաստանի ու Եվրոպայի միջեւ։ Ես հակված եմ վստահելու նրանց գնահատականներին»,- ասաց կառավարության ներկայացուցիչը։