Armenia Airways-ը սկսել է ուղիղ չվերթներ իրականացնել Երեւան-Մոսկվա երթուղով

Մարտի 16-ից Armenia Airways-ը սկսել է Boeing 737 օդանավով ուղիղ չվերթեր իրականացնել Երեւան (Զվարթնոց) - Մոսկվա (Վնուկովո) - Երեւան (Զվարթնոց) երթուղով շաբաթական չորս անգամ՝ չորեքշաբթի եւ հինգշաբթի, շաբաթ եւ կիրակի օրերին, հայտնում է Վնուկովո միջազգային օդանավակայանի մամուլի ծառայությունը:

Armenia Airways-ը հիմնադրվել է 2013 թվականին, իսկ 2018 թվականին սկսել է ակտիվ թռիչքային գործունեությունը` ռումինական Aviro Air ավիաընկերությունից BAE 146-300 տիպի ինքնաթիռներ վարձակալելով, որոնք շահագործվում են մինչ օրս։ Armenia Airways-ի պարկը մինչ օրս համալրվել է չորս Boeing-737 ինքնաթիռով։

Առաջիկայում ավիաընկերությունը մտադիր է ավելացնել Հայաստանի եւ հարեւան երկրների միջեւ ավիափոխադրումների ծավալը։ Նաեւ Ռուսաստանի Դաշնության եւ Հայաստանի ուղղություններով ուղեւորների, բեռների եւ փոստի փոխադրումների ակտիվ զարգացում է նախատեսվում։