Արցախը խիստ վտանգված է, այնտեղ տեղի է ունենում «Кольцо 2» օպերացիան

Այո, Արցախը խիստ վտանգված է։ Կարող ենք համարել, որ այնտեղ տեղի է ունենում «Кольцо 2» օպերացիան»,- «Փաստինֆո»-ի հետ զրույցում ասել է ազատամարտիկ Արթուր Այվազյանը (Մանախ)։

Վերջինիս դիտարկմամբ՝ Արցախում տեղակայված ռուս խաղաղապահների առկայության պարագայում, ՀՀ և Արցախի իշխանությունների համառ լռության ֆոնին, հայ ժողովրդի հանդեպ Ադրբեջանի կողմից իրականացնող նմանօրինակ վարքագիծն այլ բան չէ, քան լավ պլանավորված ահաբեկչություն՝ Արցախում ապրող խաղաղ բնակչության նկատմամբ. «Անգամ երբ Արցախի երկնքում ԱԹՍ-ներ են վխտում, և մենք արդեն զոհեր ունենք, հանրապետության մասշտաբով գլխավոր կապիտուլյանտն իրեն զերծ է պահում գնահատականներ տալուց։ Սա հստակ մեսիջ ունի, այն է՝ Արցախում տեղի ունեցողի վերաբերյալ իշխանական ամենաբարձր մակարդակով կանաչ լույս է միացված։ Իշխանությունները լավագույնս տեղյակ են, թե ինչ է պլանավորված Արցախի հաշվով, ինչ է դեռ կատարվելու այնտեղ և այս ամենը տեղի է ունենում նրանց հանցավոր թողտվությամբ, այսինքն՝ գործում է կուլիսային պայմանավորվածության սցենարը»,- ասում է ազատամարտիկը։

Արթուր Այվազյանը հարց է տալիս՝ եթե այս իշխանություններն, իրոք, ազգադավ ու թրքամետ չեն, ինչո՞ւ, գոնե, ներքին կարգով մոբիլիզացիա չի հայտարարվում՝ կամավորական շարժումների, աշխարհազորի միջոցով, ինչո՞ւ տագնապով ոտքի չեն հանվում Երկրապահ կամավորականների ջոկատները. «Չեմ թաքցնում, մենք չափազանց բարդ իրավիճակում ենք հայտնվել և, եթե իշխանությունների նմանօրինակ վարքը նախապես համաձայնեցված չէ, ուրեմն, այս դեպքում, առնվազն, գոնե, պետք էր մոբիլիզացիա հայտարարվեր։ Տեսնում ենք՝ Խրամորթում մարդիկ, արդեն, ինքնապաշտպանության են անցնում։ Մենք փորձում ենք միանանք նրանց, տարբեր տեսակի հանդիպումներ ենք նախաձեռնում, նույնիսկ՝ իշխանական որոշ անձանց հետ, որպեսզի մի հայտարարի գանք և գնանք Արցախ՝ օգնելու արցախցի մեր հայրենակիցներին, բայց ոչինչ չի ստացվում։ Պարզվում է՝ պետական քաղաքականությունն է այդպիսին՝ Պաշտպանության նախարարությունից և Ազգային Անվտանգության Ծառայությունից մեզ պատասխանում են՝ նման խնդիր օրակարգում չկա»,- ասում է ազատամարտիկը։