Ստեփանակերտում մեկնարկել է «Մատենա» միջազգային դպրոցի առաջնորդների մասնագիտական զարգացման երրորդ ծրագիրը. Ռուբեն Վարդանյան

Ծրագրին մասնակցելու համար մեծ թվով դիմումներ էին ստացվել, ինչն իսկապես ոգևորիչ էր: Սա ևս մեկ անգամ վկայում է, թե որքան ամուր ու անկոտրում է արցախցին, որ անգամ այս բարդ իրավիճակում կարևորում է գիտելիքը, արհամարհելով շրջափակման դժվարությունները՝ գալիս է զարգացնելու իր մասնագիտական հմտությունները:

 

«Մատենա»-ի այս երրորդ ծրագիրը հիմնականում նվիրված է ռազմավարական առաջնորդությանը, որի հիմքում վստահությունն է: Առաջնորդների, պետական ինստիտուտների նկատմամբ վստահությունն առանցքային խնդիր է: Եթե կա այդ վստահությունը՝ ցանկացած դժվարություն ու մարտահրավեր հաղթահարելի է:

 

Շուրջ հիսուն երիտասարդներ հնարավորություն կունենան ունկնդրել այս ոլորտում լավագույն մասնագետներին, որոնք իրենց փորձն ու գիտելիքները կփոխանցեն նրանց: Արցախցի երիտասարդները մեծ ներուժ ունեն և օգտագործելով այն, կատարելագործով իրենց հմտությունները՝ պետք է պատրաստ լինեն վերցնելու ավելի մեծ պատասխանատվություն իրենց ապագան իրենց պատկերացրած ձևով կառուցելու համար: