Հայտնի են Նոայի և Փյունիկի մրցակիցները Կոնֆերենցիաների լիգայի որակավորման փլեյ-օֆֆ փուլում

«Նոան» Կոնֆերենցիաների լիգայի խաղարկության որակավորման երրորդ փուլի պատասխան խաղում երեկ Աթենքում պարտվեց ԱԵԿ-ին նվազագույն հաշվով, բայց հաղթեց ընդհանուր դիմակայությունում 3-2 հաշվով և դուրս եկավ Կոնֆերենցիաների լիգայի որակավորման փլեյ-օֆֆ փուլ։

Նույն օրը Երևանի «Փյունիկը» Կոնֆերենցիաների լիգայի խաղարկության որակավորման երրորդ փուլի պատասխան խաղում նվազագույն հաշվով հաղթեց ղազախական «Օրդաբասիին» և երկու խաղերի արդյունքում առավելության հասնելով 2-0 հաշվով՝ դուրս եկավ որակավորման փլեյ-օֆֆ փուլ:

«Նոայի» մրցակիցը որակավորման փլեյ-օֆֆ փուլում կլինի Սլովակիան ներկայացնող «Ռուժոմբերոկ» ակումբը, որն այսօր արտագնա հաղթանակ տարավ Ջենարո Գատուզոյի «Հայդուկի» նկատմամբ՝ 1-0 հաշվով։ Թիմերի միջև առաջին հանդիպումն ավարտվել էր 0-0 հաշվով։ 

«Փյունիկի» մրցակիցը որակավորման փլեյ-օֆֆ փուլում կլինի Սլովենիան ներկայացնող «Ցելյե» ակումբը, որը Եվրոպա լիգայի որակավորման երրորդ փուլում ընդհանուր դիմակայությունում 2-3 հաշվով զիջել է իռլանդական «Շեմրոկին»։ Վերջինս կշարունակի պայքարը ԵԼ-ի փլեյ-օֆֆում։

 
Նշենք, որ փլեյ-օֆֆ փուլի առաջին հանդիպումները կկայանան օգոստոսի 22-ին, պատասխան խաղերը՝ 29-ին։ «Փյունիկն» ու «Նոան» առաջին հանդիպումը կանցկացնեն սեփական հարկի տակ։