«Ես թախծոտ հարցեր տվել եմ բոլոր իշխանություններին». Ուրիխանյանը «ստիպեց» վարչապետին ներողություն խնդրել

Մեր իրականության մեջ կան դառը դրվագներ, որոնք կարող են լավագույն զարգացումների համար խոչընդոտ հանդիսանալ: Այս մասին, այսօր՝ մարտի 27-ին, ԱԺ-ում դիմելով ՀՀ վարչապետ Նիկոլ Փաշինյանին, նշեց ԲՀԿ խմբակցության պատգամավոր Տիգրան Ուրիխանյանը:

Նրա խոսքով, այս տարի ՀՀ-ն պետք է սպասարկի 400 մլն դոլարից ավելի պետական պարտքի ակումուլացիա, իսկ հաջորդ տարի 800 մլն դոլարից ավելի, այն դեպքում, երբ Հայաստանի պետական բյուջեն 3 մլրդ-ից մի փոքր ավելի դոլար է կազմում. «Ինչ հետեւանքներ սա կարող է առաջացնել մեզ համար, եթե չկարողանանք հասնել վճարման հետաձգման: Կարո՞ղ է Հայաստանին սպառնալ դեֆոլտի վտանգ, կամ նվազեն անշարժ գույքի գները»,-բարց ուղղեց Ուրիխանյանը:

Նիկոլ Փաշինյանը ժպիտով արձագանքեց. «Անկեղծ ասած չգիտեմ՝ ինչու եք այդպես թախծոտ ձայնով այդ հարցը տալիս: Հասկանալի է, որ դա նորություն չէ, հասկանալի է, որ միջինժամկետ ծրագրով, բյուջեի ծրագրով այդ ամենը նախատեսված է: Ոչ, ձեր նշած որեւէ սպառնալիք Հայաստանին չի կարող սպառնալ: Ոչ, անշարժ գույքի գները ոչ թե նվազելու են, այլ բարձրանալու են: Բյուջեի եկամուտները ոչ թե նվազելու են, այլ ավելանալու են: Այս տարի, նվազագույնը 40 մլրդ դրամով ավելի գումար ենք հավաքելու բյուջե: Տնտեսական ակտիվության ցուցանիշները հիմնավորում են, որ բյուջեի եկամուտնեն ավելացնելու ենք տնտեսական աճի եւ ստվերային տնտեսության կրճատման հաշվին»,-հայտարարեց Փաշինյանը՝ հավելելով, որ տարբեր գնահատականներում Հայաստանում մինչեւ 50 տոկոս ստվեր կա:

Փաշինյանը նկատեց, որ հենց այս ստվերային գումարներով տարբեր կոռուպցիոն սխեմաներ են աշխատում:

Ի պատասխան Ուրիխանյանն ասաց. «ԱԺ կանոնակարգը չի կանոնակարգում ԱԺ պատգամավորի ձայնի ելեւէջները: Բյուջեի կեսի չափ պարտք ունենք մարելու, բա թախիծ ա, բա ի՞նչ ա: Ես թախծոտ հարցեր տվել եմ բոլոր իշխանություններին»:

Նիկոլ փաշինյանն էլ ներողություն խնդրեց Ուրիխանյանից. «Եթե իմ խոսքում որեւէ ոչ պատեհ բան նկատեցիք, ես որեւէ նման բան նկատի չունեի: Եթե նկատել ենք՝ ներողություն եմ խնդրում: Ես պարզապես ուզում էի ձեր տրամադրությունը փոխել»: