Ես լավատես չեմ պետական մարմինների վերահսկողական մեխանիզմի արդյունավետության վերաբերյալ. Նիկոլ Փաշինյան

Ես այդքան էլ լավատես չեմ մարզպետարանի կամ որևէ պետական մարմնի վերահսկողական մեխանիզմի արդյունավետության վերաբերյալ, փոխարենը մտածում եմ, որ շատ արդյունավետ կարող է լինել, եթե քաղաքացիներն իրենք վերահսկեն գործընթացը, իրենք գնահատեն, օրինակ, իրենց քաղաքապետի աշխատանքը: Այս մասին Կառավարության այսօրվա նիստում հայտարարեց ՀՀ վարչապետ Նիկոլ Փաշինյանը: «Եթե քաղաքացին վերահսկողությունն իր պարտականությունը չի համարում, կարելի է լարվել՝ 1 տարի, 2-3 տարի, վերահսկողություն սահմանել առավել խիստ, բայց եթե քաղաքացի-իշխանություն հարաբերությունների խորքային, բովանդակային փոփոխություն տեղի չի ունենում, ժամանակավոր մի բան կլինի, հետո ամեն ինչ «դարձ ի շրջանս յուր» տեղի կունենա»,- նշեց նա: Նրա խոսքով՝ ապակենտրոնացման առումով ևս խնդիր կա. «Զգում ես, որ քաղաքացին ուզում է վարչապետին ինչ-որ բան ասել, և պարզվում է, որ ինքն ուզում է՝ իր դարպասի դիմաց գտնվող ճանապարհահատվածը՝ 3 քմ, բարեկարգվի. ով պետք է լուծի այդ հարցը, եթե ոչ վարչապետը: Մեր քաղաքական ուղերձը միշտ նույնն է եղել՝ ուզում ենք, որ քաղաքացին կապ տեսնի իր գործողության և իրականության միջև»,-ասաց նա՝ նշելով, թե դրա համար իրենց շատ քննադատում են և կքննադատեն: «Որ համատարած ավերակ է մեր երկրում, եկեք խոստովանենք. այսօր գլուխ ենք գովում՝ սուբվենցիա արեցինք, սա արեցինք, նա արեցինք, գլուխ ենք գովում, որ հիմա մի մարզում այնքան ճանապարհ են նորոգում, ինչքան նախկինում ամբողջ հանրապետությունում 1 տարում, բայց իրականում դեռ այնքան պետք է կառուցենք: Համայնքներում էլ ավերակ վիճակը կապված է մի պարզ բանի հետ՝ ընտրություն կատարելու որակի ու չափանիշների հետ: Ամեն մարդ այսօրվա իր բակի, փողոցի վիճակի հետ կապը պետք է տեսնի նախորդ ընտրություններում, դրա նախորդ ընտրություններում իր քվեարկության հետ, որովհետև դա եղել է իր քաղաքական ներդրումը, և դրա արդյունքն ստացվել է»,- ասաց նա՝ հավելելով, թե իր ընկալած քաղաքական փիլիսոփայությունն այն է, որ քաղաքացու գործողությունը անմիջական ազդեցություն է ունենում իրականության մեջ. «Մենք ինչքան ուժեղացնենք քաղաքացու անհատական պատասխանատվության ինստիտուտը, այնքան կունենանք ուժեղ պետություն՝ բոլոր առումներով՝ սկսած անվտանգությունից, վերջացրած տնտեսությունից, առողջապահությունից»,-ասաց Նիկոլ Փաշինյանը: