Ինչու է Արսեն Թորոսյանը որոշել հրաժարական ներկայացնել

Հայկական լրատվամիջոցների տեղեկություններով, երկու օր առաջ առողջապահության նախարար Արսեն Թորոսյանը հրաժարական է ներկայացրել, բայց վարչապետ Նիկոլ Փաշինյանը պատռել է այն՝ հայտարարելով, որ նախարարը չի որոշում` երբ աշխատել ու երբ հեռանալ։ Երեկ վարչապետն արձակուրդ ուղարկեց նախարարին:

Արսեն Թորոսյանը փակել է իր էջերը սոցցանցերում, որը նրա հրաժարականի մասին ենթադրությունների պատճառ է դարձել։ Առավել եւս, տեղեկություն է հայտնվել, որ պարետատունը նախարարին առաջարկել է մանրամասն ֆինանսական հաշվետվություն ներկայացնել։ Երեկ նախարարությունը ներկայացրել է ընդհանուր հաշվետվություն, առանց բացվածքի:

Առողջապահության նախարարի հրաժարականն այլ ժամանակ սովորական բան կլիներ, բայց վերջին մի քանի ամիսներին, երբ բոլոր իրադարձություններն ու ֆինանսները պտտվում են կորոնավիրուսի շուրջ, առողջապահության նախարարը դառնում է կառավարության քաղաքականության արդյունավետության չափիչը համաճարակի պայմաններում։

Մոտենում է արտակարգ դրության ժամկետի ավարտը, եւ մի քանի շաբաթից երկիրը կարող է գոնե մասամբ վերադառնալ նորմալ կյանքի։ Այդ ժամանակ հարցեր կլինեն, թե որքանով էր արդյունավետ պայքարը, ինչ միջոցներ են ծախսվել, որքանով էին արդարացված։ Չնայած քաղաքականությունը կառավարությունն է վարել, բայց հիմնական պատասխանատվությունն ընկնում է առողջապահության նախարարի վրա։ Նիկոլ Փաշինյանը կառավարության վերջին նիստում ակնարկել է, որ այս փուլում Թորոսյանը գրեթե ֆինանսների նախարարն էր։ Այսինքն, պետական միջոցները հիմնականում ծախսվել են Առողջապահության նախարարության միջոցով, ասում է Փաշինյանը։

Ֆինանսական հաշվետվությունները կարեւոր են, առավել եւս քիչ չեն ենթադրությունները, որ շատ միջոցառումներ ձեռնարկվել են փող ծախսելու համար (ոչ միայն Հայաստանում, այլ ամբողջ աշխարհում)։ Շատ միջոցառումների արդյունավետությունը, օրինակ, էլեկտրոնային ջերմաչափեր գնելու պահանջը, դժվար է չափել։ Իսկ այնտեղ, որտեղ դժվար է չափել, միշտ կոռուպցիայի, անարդյունավետության, պարտադրանքի ռիսկեր կան։

Վերջին վիճելի հարցը դպրոցներում դիմակ դնելու որոշումն է։ Ծնողները տարակուսանքի մեջ են՝ երեխաներն ամբողջ ամառ բակում խաղացել են առանց դիմակի, իսկ դպրոց չգիտես ինչու դիմակով պետք է գնան։ Դա հղի է ոչ միայն շնչառական ու ալերգիկ խնդիրներով։ Այդ միջոցառման չհիմնավորվածությունը տարատեսակ դավադրապաշտական հարցեր է առաջացնում՝ արդյոք դա չի արվում ավելի շատ դիմակ վաճառելու համար։ Ո՞վ եւ որտե՞ղ է դիմակներ վաճառում։ Ու՞մ է կառավարությունը մեծ գումարներ վճարելու։

Ըստ ամենայնի, այդ բոլոր հարցերին պետք է առողջապահության նախարարը պատասխաներ, այդ պատճառով, հնարավոր է, որոշել է հրաժարական ներկայացնել արտակարգ դրության ժամկետի ավարտից առաջ։ Չէ՞ որ արտակարգ դրության ավարտից հետո արդեն առողջապահության նախարարությունն ու պարետատունը չեն օպերատիվ բաշխելու ֆինանսները, այլ համապատասխան մարմինները։ Հարկ է լինելու ցույց տալ ծախսված միջոցների արդյունավետությունը։ Եթե արդյունավետությունը չապացուցվի, հակադարձ համեմատական կազդի կառավարության վարկանիշի վրա։ Իսկ «թեժ աշնան» նախօրեին դա կարող է տհաճ գործոն լինել կառավարության համար։