Այդքան էր իր խելքը հասնում. Լեւոն Երանոսյանը՝ Նիկոլ Փաշինյանի մասին

Երևանի ընդհանուր իրավասության դատարանում՝ դատավոր Հարություն Մանուկյանի նախագահությամբ, այսօր կայացել է ոստիկանության զորքերի նախկին հրամանատար, ոստիկանության գեներալ-լեյտենանտ Լևոն Երանոսյանի գործով դատական նիստը։

Նշենք, որ գործը գտնվում է ապացույցների հետազոտման փուլում և այս դատական նիստին ուսումնասիրվել են գործում առկա տեսաձայնագրությունները։

Տեսագրություններից մեկում արձանագրված է Նիկոլ Փաշինյանին ձերբակալելու պահը, ինչի ընթացքում ստեղծվել էր խառնաշփոթ, բազմությունը թույլ չէր տալիս իրականացնել այդ գործողությունները, ինչի հետևանքով կիրառվել են հատուկ միջոցներ։ Պաշտպան Տիգրան Սաֆարյանն արձանագրեց, որ այդ հատուկ միջոցները կիրառվել են հնարավորինս սակավամարդ տաևածքներում, իսկ ոստիկանության ծառայողների ուղղությամբ քաղաքացիները իրեր են նետել։

Դատարանում ուսումնասիրվել է նաև այն տեսանյութը, որտեղ երևում է, որ Վալերի Օսիպյանի հետ բանակցությունների ավարտից հետո Փաշինյանը փորձել է անցնել փշալարերով, ինչից հետո հավաքը, ըստ փաստաբանի, դադարել է լինել խաղաղ։

Դատարանում հետազոտվել են նախաքննության կողմից ներկայացված բոլոր սկավառակները՝ ՝ բացառությամբ վեց սկավառակի՝ տեխնիկական խնդիրների պատճառով։ Նախատեսվում է,որ դրանք կհետազոտվեն հաջորդ դատական նիստին, որից հետո կուսումնասիրվեն նաեւ իրեղեն ապացույցները։

Հաջորդ դատական նիստը նշանակվել է փետրվարի 26-ին՝ ժամը 11։00-ին։

Դատական նիստի ավարտից հետո լրագրողների հետ զրույցում Լևոն Երանոսյանն անդրադարձավ պատերազմին՝ նշելով, որ մենք հաղթած բանակ էինք, տեսանք՝ ինչ եղավ։

«Թող Նիկոլը պատասխանի այդ հարցերին։ Այդքան էր իր խելքը հասնում, դրա համար էլ պարտվեց այս պատերազմը»,- նշեց Երանոսյանը։
Պաշտպան Սաֆարյանն էլ հայտնեց, որ Արցախ մեկնելու ընթացքում Լևոն Երանոսյանին ձերբակալելու մասին որոշման դեմ բողոք է ներկայացվել դատախազություն, այժմ սպասում են ընթացքին։

«Փաստինֆո»-ն ավելի վաղ տեղեկացրել է, որ Լևոն Երանոսյանը մեղադրվում է պաշտոնեական լիազորություններն անցնելու մեջ: Ըստ մեղադրանքի` 2018 թվականի ապրիլի16-ին և 22-ին ՝Երևան քաղաքում անցկացված բողոքի զանգվածային ակցիաների ժամանակ, ցուցարարների նկատմամբ գործադրել է, ընդհանուր առմամբ, 8 հատ «Զարյա» տեսակի լուսաձայնային նռնակներ, ինչի հետևանքով 2 տասնյակից ավելի անձանց առողջությանը պատճառվել է տարբեր աստիճանի, այդ թվում` ծանր և միջին ծանրության վնաս:

Լևոն Երանոսյանի կողմից հատուկ միջոցների գործադրման հետևանքով Բաղրամյան պողոտայում ծառայություն իրականացնող ՀՀ ոստիկանության զորքերի զինծառայողներից 6 հոգի նույնպես ստացել են մարմնական վնասվածքներ:

Նշենք նաև, որ գործով տուժողներից են նաև ՀՀ վարչապետ Նիկոլ Փաշինյանը և ԱԺ փոխխոսնակ Ալեն Սիմոնյանը։
ՀՀ ոստիկանության ներքին զորքերի նախկին հրամանատարի նկատմամբ խափանման միջոց է ընտրվել ստորագրությունը երկրից չհեռանալու մասին:

Ավելին՝ այստեղ