Կորոնավիրուսից մահացածների մարմիններն այրում են հենց փողոցում /Տեսանյութ, լուսանկարներ/

Հնդկաստանում չորրորդ օրն անընդմեջ կորոնավիրուսի ամենօրյա դեպքերի թիվը ռեկորդ է գրանցել: Այսօր այնտեղ հայտնաբերվել է վարակի ավելի քան 360 հազար դեպք: Միևնույն ժամանակ, վերջին օրվա ընթացքում մահացել է ավելի քան 2,700 մարդ, իսկ վերջին հինգ օրվա ընթացքում՝ գրեթե 12,000:

Ըստ Associated Press-ի, շատերը մահանում են թթվածնի պակասից: Հուսահատված մարդիկ հիվանդանոցից հիվանդանոց են գնում ՝ թթվածնով բալոններ գտնելու համար, մինչ նրանց հարազատները մահանում են՝ սպասելով օգնության:

Նշվում է, որ երկրում դիակիզարանները գերծանրաբեռնված են, ուստի մահացածների մարմիններն այրում են հենց փողոցում:

Բուժաշխատողներն ասել են, որ այն, ինչ տեղի է ունենում, շատ նման է պատերազմի:

Ընդհանուր առմամբ, երկրում կա 16,960,172 վարակված մարդ: Տեղի բնակիչները կարծում են, որ այս թիվը կարող է սխալ լինել, քանի որ պաշտոնապես գրանցվում են միայն հաստատված դեպքերը:

Ստեղծված իրավիճակում շատերը մեղադրում են կառավարությանը, որը վերջերս հայտարարեց համաճարակի դեմ հաղթանակի մասին: Դրանից հետո մարդիկ սկսել են թուլացնել անվտանգության միջոցառումները և զանգվածային երեկույթներ կազմակերպել:

Ընդհանուր առմամբ, ըստ պաշտոնական տվյալների, Հնդկաստանում կորոնավիրուսից մահացել է 192 311 պացիենտ: