Ես և մեր թիմը պատրաստ ենք պահպանել ժողովրդի հաղթանակը և թույլ չենք տա քաղաքացիական պատերազմ. «Միասնություն» շարժման ղեկավար Արման Վարդանյան

«Միասնություն» շարժման ղեկավար Արման Վարդանյանը ֆեյսբուքյան իր էջում գրել է.

«Մի քանի օրից Հայաստանում տեղի կունենան արտահերթ խորհրդարանական ընտրությունները։ Նախընտրական շրջանում գեներացված ատելությունը, հասարակությանը տարբեր ճամբարների բաժանելը հետընտրական գործընթացներում կարող է վերածվել լրջագույն մարտահրավերի, իսկ այդ մարտահրավերն էլ` քաղաքացիական պատերազմի։ Այդ իսկ պատճառով` ընտրությունների մասնակից ուժերը, անկախ նրանից, թե ում ժողովուրդը կտա իր վստահության քվեն, պարտավոր են ընդունել ՀՀ քաղաքացիների կամարտահայտման այդ դրսևորումը և սեղմել հաղթող կողմի ձեռքը` խուսափելու իրավիճակի հետագա լարումից։ Հավաստիացնում եմ` ես և մեր թիմը, այս գաղափարը կիսող բազմաթիվ քաղաքացիներ պատրաստ ենք կանգնել ժողովրդի մեծամասնության ընտրության կողքին և թույլ չենք տալու քաղաքացիական բախումներ և պատերազմ։

Անելու ենք ամեն ինչ, որպեսզի Հայաստանում տիրի համերաշխության մթնոլորտը՝ անկախ, թե ով կհաղթի։ Դա ես ասում եմ` որպես մարդ, ով որոշում կայացրեց չմասնակցել այս ընտրություններին և չքաղաքականացնել իր թիմը` միևնույն ժամանակ վստահ լինելով, որ արտահայտում եմ տվյալ գաղափարը կիսող մեր տասնյակ հազարավոր քաղաքացիների դիրքորոշումը։

Մենք ժողովրդի հետ միասին տեր ենք կանգնելու հաղթանակին, թույլ չենք տալու բախումներ, և փորձելու ենք Հայաստանի պատմության մեջ նոր մաքուր էջ բացել և երկիրը տանել դեպի զարգացում»: