Էրդողանը որոշում է ընդունել, որը առաջացրել է թուրքական սոցիալական մեդիայի զայրույթը

Թուրքիայի նախագահ Ռեջեփ Թայիփ Էրդողանը հայտարարել է, որ կեսգիշերից հետո երկրում կարգելվի բարձր երաժշտությունը, գրում է Ahval-ը:

Հայտարարությունն արվել է երկուշաբթի Անկարայում կայացած երեքժամյա նիստից հետո և սուր քննադատություն առաջացրել սոցցանցերի որոշ օգտատերերի շրջանում: Նրանք այդ քայլը համարում են ևս մեկ ապացույց, որ Թուրքիայի նախագահը փորձում է իր իսլամական արժեքները պարտադրել բնակչությանը:

Իշխանության գալով՝ իրեն բարեպաշտ մահմեդական համարող Էրդողանը խոստացել է ստեղծել ավելի բարեպաշտ թուրքերի նոր սերունդ՝ բացելով իսլամական հոգևոր դպրոցներ, բարձրացնելով ալկոհոլի և ծխախոտի հարկերը: Ապրիլին՝ կորոնավիրուսի դեմ պայքարի ժամանակ, նրա կառավարությունն արգելեց ալկոհոլի վաճառքը:

Սոցցանցերից օգտվողները ստեղծել են #KUSURABAKIYORUZ հեշթեգը՝ Էրդողանի հայտարարության կապակցությամբ իրենց զայրույթը հայտնելու համար: Երեքշաբթի Թուրքիայում դա «Թվիթերի» ամենատարածված թեման էր:

«0:00-ից հետո մեր երկրում արգելվում է երաժշտությունը: Այո՛, սա Թուրքիան է: Նրանք փորձում են արգելափակել այն ամենը, ինչ կապված է արվեստի և մշակույթի հետ, մեկ առ մեկ խլում են մեր ազատությունները»,- գրել է «Թվիթերի» օգտատեր Մելիքե Գյունայդինը:

Մի քանի հաղորդագրություններում զբոսաշրջիկներին նույնիսկ կոչ է արվել հեռու մնալ Թուրքիայից, փոխարենն առաջարկել են այցելել միջերկրածովյան մրցակից Հունաստան: