Բաբաջանյան փողոցում վթարի հետեւանքով 59-ամյա տղամարդ է մահացել (ֆոտո)

2021թ. օգոստոսի 27-ին՝ ժամը 08:40-ի սահմաններում, Երեւան քաղաքի Բաբաջանյան փողոցում «Օպել» մակնիշի ավտոմեքենայի վարորդը վրաերթի է ենթարկել Երեւան քաղաքի բնակիչ, 59-ամյա տղամարդու, որից  հետո նույն ավտոմեքենան ընդհարվել է մեկ այլ «Օպել» մակնիշի ավտոմեքենային եւ կանգ առել: Պատահարի հետեւանքով ստացած մարմնական վնասվածքներից 59-ամյա տղամարդը տեղում մահացել է:

Ինչպես NEWS.am-ը տեղեկանում է Քննչական կոմիտեի տեղեկատվության եւ հասարակայնության հետ կապերի բաժնից, դեպքի առթիվ Երեւան քաղաքի քննչական վարչության ճանապարհատրանսպորտային հանցագործությունների քննության բաժնում հարուցվել է քրեական գործ՝ ՀՀ քրեական օրենսգրքի 242-րդ հոդվածի 2-րդ մասով: Վրաերթի ենթարկված տղամարդը ճանաչվել է տուժող:

Նախաքննության ընթացքում կատարվել են դեպքի վայրի եւ տրանսպորտային միջոցի զննություններ, նշանակվել է դիակի դատաբժշկական փորձաքննություն:  Պարզվել է, որ քաղաքացուն վրաերթի ենթարկած վարորդը գտնվել է սթափ վիճակում:

Նախաքննությունը շարունակվում է: Ձեռնարկվում են միջոցառումներ՝ պատահարի բոլոր հանգամանքները պարզելու, օբյեկտիվ եւ բազմակողմանի քննություն  ապահովելու ուղղությամբ: