Հայաստանի պետական պարտքը գերազանցեց 9,2 մլրդ ԱՄՆ դոլարը (Գրաֆիկ)

Ի հեճուկս կառավարության բարձրագոչ հայտարարությունների՝ Հայաստանի պետական պարտքը շարունակում է աճել։ Միայն այս տարվա 10 ամիսների ընթացքում պետական պարտքն աճել է 1,2 մլրդ ԱՄՆ դոլարով կամ 15,6 տոկոսով՝ գերազանցելով 9,2 մլրդ-ը։Մի կողմից պետական եկամուտների կոմիտեն պարբերաբար հայտարարություններ է տարածում աննախադեպ հարկային եկամուտների հավաքագրումների մասին, մյուս կողմից կառավարությունը շարունակում է արագ տեմպերով պարտք կուտակել։ Սա նշանակում է, որ երկնիշ տնտեսական աճի փոխարեն այս տարի երկնիշ պարտք կկուտակենք։

Հկանշական է, որ այս ընթացքում ավելացել է ոչ միայն  արտաքին, այլեւ ներքինպարտքը։ Մասնավորապես՝ 2021 թվականի հունվար-հոկտեմբեր ամիսներին Հայաստանի Հանրապետության միայն արտաքին պարտքն աճել է 647,4 մլն դոլարով կամ 10,6 տոկոսով, իսկ ներքինը՝ 593,4 մլն ԱՄՆ դոլար կամ 31 տոկոսով։

2011 թվականի մարդահամարի հիմքով վարվող բնակչության ընթացիկ հաշվառմամբ՝ ՀՀ մշտական բնակչության թվաքանակի ցուցանիշը 2021թ. հոկտեմբերի 1-ի դրությամբ կազմել է 2 966.8 հազ. մարդ։ Հետևաբար ստացվում է, որ ՀՀ յուրաքանչյուր քաղաքացի պարտք է 3104 դոլար․ տարեսկզբի համեմատ մեկ շնչին ընկնող պետական պարտքը ավելացել է 418  դոլարով կամ 15,6 տոկոսով։

Գործնականում խնդիրը պետական պարտքի մեծությունը չէ, այլ դրա արդյունավետ ծախսելը։ Խիստ մտահոգիչ է պարտքի և համախառն ներքին արդյունքի մեծությունների դինամիկան։ Ստացվում է, որ տնտեսությունն աճել է 4,4 տոկոսով, իսկ պետական պարտքը՝ 15,6 տոկոսով։ Այս ցուցանիշներից պարզ է դառնում, որ պետական պարտքի հավելաճը չի նպաստել տնտեսության աճին, զարգացմանը, ինչը լրացուցիչ բեռ է դառնում հաջորդ սերունդների համար։