ԿԸՀ ներկայացրեցինք օրենքի նախագիծ, որով խիստ քրեական պատիժ է նախատեսվում ՀՀ անունից Արցախը այլ պետության կազմում ճանաչելը. Ավետիք Չալաբյան

Ինչպես շատերդ գիտեք, այս երկուշաբթի մենք ԿԸՀ ներկայացրեցինք օրենքի նախագիծ, որով խիստ քրեական պատիժ է նախատեսվում ՀՀ անունից Արցախը այլ պետության կազմում ճանաչելու, ինչպես նաև Հայոց ցեղասպանության միջազգային ճանաչումից հրաժարվելու համար: Ստորև ներկայացնում եմ օրենքի նախագիծն ամբողջությամբ, այն ակնկալիքով, որ դուք անմիջականորեն կաջակցեք նրա ընդունմանը, և դրանով կկանխեք հայոց պետականության հիմքերի կազմաքանդումը թշնամու և նրա կամակատարների կողմից:

 

»»»»»»»»»»»»»»»»»»»»»»»»»»»»»»»»»»

ՕՐԵՆՍԴՐԱԿԱՆ ՆԱԽԱԳԻԾ

Հայաստանի Հանրապետության Քրեական Օրենսգրքում Լրացում Կատարելու Մասին

Հոդված 1. 2021 թվականի մայիսի 5-ի Հայաստանի Հանրապետության քրեական օրենսգիրքը լրացնել հետևյալ բովանդակությամբ 420.1 և 420.2 հոդվածներով.

«Հոդված 420.1. Արցախը որևէ այլ պետության կազմում ճանաչելը

 

1. Հայաստանի Հանրապետության անունից Արցախը որևէ այլ պետության կազմում ճանաչելը՝ պատժվում է ազատազրկմամբ՝ տասից տասնհինգ տարի ժամկետով:

Հոդված 420.2. Հայոց ցեղասպանության ճանաչումից հրաժարվելը, Հայոց ցեղասպանությունը հրապարակայնորեն հերքելը, արդարացնելը կամ դրա վտանգավորությունը նսեմացնելը

 

1. Հայաստանի Հանրապետության անունից Հայոց ցեղասպանության ճանաչումից հրաժարվելը, Հայոց ցեղասպանությունը հրապարակայնորեն հերքելը, արդարացնելը կամ դրա վտանգավորությունը նսեմացնելը՝ պատժվում է ազատազրկմամբ՝ տասից տասնհինգ տարի ժամկետով»:

 

Հոդված 2. Սույն օրենքն ուժի մեջ է մտնում պաշտոնական հրապարակման օրվան հաջորդող տասներորդ օրը։