Հավաքական ընդդիմությունը, առնվազն հինգ տարի հայտարարում է, որ այսօրվա կառավարիչների մեկ օր ավելի մնալը իշխանության՝ վնասում է ՀՀ շահերին, այդ ի՞նչ պատահեց, որ հիմա էլ ասում են մեկ տարի սպասենք, մինչև ընտրությունները գա. Սերժ Սարգսյան

2018 թվականից չի սկսվել այդ պրոցեսը, և եթե ուշադրությամբ դիտել եք երկրորդ նախագահի հարցազրույցը, ապա իր կողմից սկսվել է 2008 թվականից հետո: Այս մասին Հակակոռուպցիոն դատարանում լրագրողների հետ զրույցում ասաց ՀՀ երրորդ նախագահ Սերժ Սարգսյանը՝ պատասխանելով լրագրողի հարցին, թե ինչու են իրեն, այսպես ասած, փորձում թիրախավորել:

Լրագրողի հարցին, թե ինչու՞ չեն կանխվում Ադրբեջանի կողմից առաջ քաշված կեղծ թեզերը՝ նա պատասխանեց. «Ես չեմ կարող ենթադրել, թե ինչու ՀՀ կառավարիչները չեն արձագանքում, չեն արձագանքում, որպեսզի մեղմեն հարևան երկրի զայրույթը, կամ դուր գան,  որպեսզի նա ինչ-որ բարի գործեր անի իրենց համար: Երևի իրենք ուզում են ինչ-որ համաձայնագիր ստորագրել, որի մասին հանրությունը տեղյակ չէ: Իմիջայլոց, երբ խոսում ենք իմպիչմենթի մասին, որևէ մեկին չի հետաքրքում , թե մեր դիրքորոշումն ինչու է այդպիսին: 2021 թվականին ես երբեք ու որևէ տեղ չեմ ասել, այո՛ , ես դեմ եմ եղել ընտրություններին, բայց ոչ թե դա փաստարկելով որպես ընտրությունները լեգիտիմացնելու քայլ, այլ ես շատ հստակ ասել եմ, որ ես խորապես համոզված եմ, և իմ այդ համոզմունքը հիմնված է քաղաքական դաշտի և ժողովրդի տրամադրությունները ուսումնասիրելու վրա, որ միանշանակ այսօրվա կառավարիչը հաղթելու է այդ ընտրություններում և մենք դառնալու ենք մասնակիցը կապիտուլացիայի լեգիտիմացման և միջազգային հանրությունը մեզ՝ հայ ժողովրդին, մեղադրելու է այդ կապիտուլացիայի համար»,-ասել է ՀՀ երրորդ նախագահը:

Նրա խոսքով՝ մեկ կամ երկու տարի անց էլ մեր դաշնակիցները հենց դրա վրա էին հղում կատարում: Վերադառնալով իմպիչմենթի վերաբերյալ հարցին՝ նա ասաց.

«Հիմա մենք ասում ենք, որ պաշտպանում ենք իմպիչմենթը՝ ելնելով հետևյալ հանգամանքից. մենք՝ այսինքն հավաքական ընդդիմությունը, առնվազն հինգ տարի հայտարարում է, որ այսօրվա կառավարիչների մեկ օր ավել մնալը իշխանության՝ վնասում է ՀՀ շահերին: Այդ ինչ պատահեց, որ հիմա էլ ասում են մեկ տարի սպասենք, մինչև ընտրությունները գա», -ասաց ՀՀ երրորդ նախագահը:

Հիշեցնենք, Սերժ Սարգսյանին նոր մեղադրանք է առաջադրվել։ Նրան մեղադրում են 20 տարվա վաղեմության մի գործարքի համար, որը նա կնքել է պաշտպանության նախարար եղած տարիներին: Խոսքը հողերի օտարման մասին է։ Ըստ մեղադրանքի՝ Սերժ Սարգսյանն Իսակովի պողոտայի որոշ հողամասեր ՀՀ երկրորդ նախագահին պատկանող «Տոյոտա-Երևան»-ին փոխանցելու համար դրանք վաճառել է էժան գնով: