Փոխվարչապետը՝ Մոսկվայում կայանալիք հանդիպման և օրակարգի մասին /Տեսանյութ/

Հանդիպման օրակարգի շրջանակները դեռևս զուտ հունվարի 11-ի հայտարարությունն է, ավելի կոնկրետացում չունենք, կհանդիպենք՝ կտեսնենք։ Այս մասին լրագրողների հետ զրույցում հայտարարել է ՀՀ փոխվարչապետ Մհեր Գրիգորյանը, խոսելով հունվարի 30-ին Մոսկվայում Հայաստանի, Ադրբեջանի և Ռուսաստանի փոխվարչապետների հանդիպման մասին։

Հարցին, թե Հայաստանն ինչ օրակարգով է գնում Մոսկվա, Գրիգորյանն ասաց, որ օրակարգի ձևավորվելու համար նախ պետք է հանդիպում լինի․ «Այս պահին հունվարի 11-ի օրակարգի և, մասնավորապես օրակարգի 4-րդ կետի շրջանակում ենք լինելու»։

Հարցին՝ արդյո՞ք իրատեսական է համարում ապաշրջափակումն ամբողջությամբ, փոխվարչապետը նշեց, որ բարդ աշխատանք է․ «Շատ հարցեր կան, որոնք պետք է վերլուծվեն և կարգավորվեն, բայց իհարկե հնարավոր համարում եմ»։

Գրիգորյանը շեշտեց, որ բազմաթիվ բաղադրիչներ կան, այդ թվում, անվտանգության․ «Վստահ եմ, որ խնդրի լուծման համար բոլոր այդ բազմաթիվ բաղադրիչները պետք է մանրաամասն ենթարկվեն փորձաքննության, որպեսզի ձևավորվի համակարգ, որն իրոք կաշխատի»։

Գրիգորյանը նշեց, որ հանդիպմանը պետք է փոխվստահության մթնոլորտ լինի․ «Կհանդիպենք , կտեսնենք։ Բայց այդ մթնոլորտը պետք է լինի, որպեսզի նպատակն իրականանա, հակառակ դեպքում դժվար կլինի իրականացնել այն»,-ասաց նա։