ՏԵՍԱՆՅՈՒԹ․ Տանը քնած էի, զանգեցին ու հարցրեցին՝ կուզե՞ս օգնական լինես, ես էլ մանկուց երազում էի ու ասացի՝ այո․ Փաշինյանի օգնականը բողոքող ծնողների հետ է․ tert.am

Նիկոլ Փաշինյանի օգնական Գագիկ Իսախանյանը, ով ներկա էր անհետ կորած զինծառայողների հարազատների՝ Կառավարության դիմաց անցկացվող բողոքի ակցիային, լրագրողների հարցին, թե ի՞նչ կարգավիճակով է մասնակցում ակցիային, նշեց՝ անհետ կորած զինծառայողների հարազատների կողքին է:

«Ես ծնողների կողքին եմ և կանգնած եմ նրանց կողքին ու մասնակցում եմ ակցիային, ոչ թե հանդիսանում Կառավարության կողմից տեղեկատվություն փոխանցող»,- ասաց նա։

Լրագրողների հարցին՝ կիսում է ակցիա իրականացնող անձանց կարծիքը, որ Կառավարությունը դանդաղում է իր գործողություններում, նա պատասխանեց, որ բոլոր ոլորտներում էլ թերություններ կան:

«Բոլոր ոլորտներում անխտիր թերություններ կան: Ես ծնողների կողքին եմ, մենք բոլորս պետք է այդ թերացումները գտնենք ու վերահսկենք: Ես պետական մակարդակի վրա լծակներ ունեմ, և այդ թերացումները վերացնենք»,- ասաց նա:

Գագիկ Իսախանյանի կարծիքով՝ գերիների վերադարձի հարցում խոչընդոտ են լրատվամիջոցները:

«Լրատվամիջոցները խանգարում են ծնողներին և բոլոր այլ հարցերում ևս խոչընդոտ են: Ես վարպետացած չեմ «միկրաֆոնների» առաջ խոսելուն, ես ստոմատոլոգ եմ, և մարդու աշխատանքն ու իր էությունը բացարձակ կապ չունեն: Լրատվամիջոցները խանգարում են՝ որոնողական աշխատանքներին, գերիներին վերադարձնելու աշխատանքներին»,- ասաց Գագիկ Իսախանյանը:

Նիկոլ Փաշինյանի օգնականը նաև պատասխանեց լրագրողների հարցին, թե ինչպես վարչապետի օգնական դարձել: «Տանը քնած էի, զանգեցին ու հարցրեցին՝ կուզե՞ս օգնական լինես, ես էլ մանկուց երազում էի ու ասացի՝ այո»,- ասաց նա։

Լրագրողների հարցին, թե կիսո՞ւմ է ակցիա իրականացնողների կարծիքը ստեղծված իրավիճակի վերաբերյալ, Գագիկ Իսախանյանը պատասխանեց՝ ոչ բոլորինը:

«Շատ թերություններ եմ տեսել, բայց չեմ ուզում բարձրաձայնել, քանի դեռ այդ հարցը չի լուծվել: Ես մասնակցում եմ ակցիային, բայց ոչ բոլորի կարծիքն եմ կիսում: Նիկոլ Փաշինյանը՝ որպես անձ կարողանո՞ւմ է ինչ-որ բան փոխել, բայց չի անո՞ւմ»,- ասաց Գագիկ Իսախանյանը: