44–օրյա պատերազմի ընթացքում ունեցել ենք 3773 զոհ, 243 զինծառայող անհետ կորած է համարվում. Նիկոլ Փաշինյան

Կառավարության 2021-26 թվականների գործունեության ծրագիրը ներկայացնում եմ արտառոց պայմաններում։ Այս մասին այսօր՝ օգոստոսի 24-ին, Ազգային ժողովում Կառավարության ծրագիրը ներկայացնելիս ասաց վարչապետ Նիկոլ Փաշինյանը։

«2020 թվականի 44-օրյա պատերազմի ծանր հետեւանքները, պատերազմի ընթացքում մեր ունեցած 3773 զոհերը, 243 զինվորների գտնվելու վայրը, անհայտ լինելու հանգամանքը, մեր գերեվարված զինվորների մի մասի դեռեւս վերադարձած չլինելու փաստը, հազարավոր տեղահանվածները, Արցախում եւ Հայաստանում ստեղծված ոչ սովորական եւ բարդ սոցիալ-տնտեսական վիճակը, Հայաստանի եւ Արցախի շուրջ ահագնացող մարտահրավերները, ՀՀ ինքնիշխան տարածք ադրբեջանական ԶՈՒ-երի ապօրինի ներխուժման հետեւանքով Սոթք-Խոզնավար հատվածում առկա ճգնաժամային իրավիճակը, նոյեմբերի 9-ից հետո ռազմական գործողությունների դադարեցման վերաբերյալ եռակողմ հայտարարության պարբերական խախտումները եւ դրա հետեւանքով նոր զոհերի առկայությունը, միջազգային լարված դրությունը, կորոնավիրուսի շարունակվող համավարակն արտառոց են դարձնում այն միջավայրը, որում պիտի քննարկենք կառավարության ծրագիրը։

Այս քննարկումը, սակայն, պիտի լինի ոչ միայն խնդիրների ու մարտահրավերների արձանագրման, այլեւ դրանց պատճառների ու ծագումնաբանության մասին եւ ամենակարեւորը, պիտի լուծման ուղիներ նախանշի՝ կարճաժամկետ, միջնաժամկետ, նաեւ ռազմավարական հեռանկարի առումով, որովհետեւ ակնհայտ է, որ ՀՀ-ն գտնվում է ճակատագրական ու շրջադարձային հանգրվանում, մի կետի վրա, որտեղից շարունակությունը վճռորոշ է լինելու մեր պետության ու պետականության համար»,- նշեց Փաշինյանը։

Նա հույս հայտնեց, որ այսօրվա քննարկման ոճաբանությունը, բովանդակությունն ու դրա խորությունն ու մթնոլորտը համապատասխան կլինի այն օրակարգին, որի առաջ այսօր կանգնած է Հայաստանը։

Փաշինյանն ասաց, որ մեր պետության ու ժողովրդավարության ինստիտուցիոնալ կայացման իմաստով վերջին ամիսների կարեւոր ձեռքբերում է եղել. «Բազմամյա չլուծված օրակարգեր ի վերջո անշրջելի լուծում են ստացել 2021 թվականի արտահերթ խորհրդարանական ընտրություններով։ Ընտրությունների ինստիտուտը ՀՀ-ում նորովի դրսեւորվեց 2021 թվականին։ Երրորդ հանրապետության պատմության միջին վիճակագրական ստանդարտը հետեւյալն էր՝ ընտրությունների պաշտոնական արդյունքների հրապարակմանը հետեւում են իշխանության կողմից ընտրությունների կեղծման մասին վկայող համոզիչ փաստեր, այդ ամենը զուգորդվում էր հանրային քաղաքական հուզումներով, ի հայտ էր գալիս կամ ավելի էր խորանում ներքաղաքական ճգնաժամը»։

Ըստ Փաշինյանի 2021 թվականի արտահերթ խորհրդարանական ընտրությունների արդյունքներով հաղթահարվել է ներքաղաքական ճգնաժամը. «Սա ընտրությունների թերեւս ամենաանսպասելի արդյունքն է, որովհետեւ 44-օրյա աղետալի պատերազմից հետո մինչեւ քարոզարշավի ավարտը ներքաղաքական դիսկուրսը կառուցվում էր գործող իշխանության ներկայացուցիչներին, մասնավորապես, վարչապետին, նրա եւ իշխանության ներկայացուցիչների ընտանիքների անդամների դավաճանության, հողեր հանձելու, վաճառելու, կապիտուլյացիայի մեջ մեղադրելու եւ նրանց պատժելու, հաշվեհարդարի ենթարկելու, ընդհուպ հրապարակային գնդակահարելու տրամաբանության վրա, ինչի գործնական դրսեւորումը տեսանք ԱԺ նախկին նախագահ, ԱԳ նախարար Արարատ Միրզոյանի դեմ մահափորձի, կառավարական շենքերում տեղի ունեցած հարձակումների տեսքով»։